Kung ating paghahambingin ang mga senador ngayon
at sa mga senador sa nakalipas na panahon
mayroong pagkakaiba sa aspeto ng korapsiyon
at sa mga anomalya na ang sangkot ay senador
noong araw sa senado ang isip ay nakatuon
sa pagrerepaso ng batas nitong ating konstitusyon
2.
Noong araw ang labanan ng usapin sa senado
ay patalasan ng isip at tagisan ng talino
lahat pawang mahuhusay respetadong pulitiko
mahinahon kahit anong uri pa ng argumento
katulad ng yumaong si Benigno “Ninoy” Aquino
ni Manglapus, ni Maceda, Pelaez at Tolentino
3.
Eva Kalaw, Gil Puyat at ni Rogelio dela Rosa
Raul Rocco, Jose Diokno, at ni Jovito Salonga
Miriam Defensor Santiago, Salvador Laurel, Aytona
Leticia Ramos Shahani, at ni Lorenzo Tanada
Agapito “Butz” Aquino, Rasul, Ernesto Herrera
ni Aquilino Pimentel at ni Teofisto Guingona
4.
Ngunit ngayon ang senado at tila nagiging pugad
nitong mga mandarambong at ng mga mandugugas
at ng mga pulitikong nagdudunungan sa batas
kahit walang nalalaman kung maka-asta ay wagas
mayrong mga nakasuhan na hindi na mahagilap
at ng mga nangangakong hindi naman tinutupad
5.
Mula nang ang senado ay mapasukan ng artista
ang talento sa pag-arte ay namana na ng iba
tila mayrong tele-serye na punong-puno ng drama
mayrong mga nag-iyakan sa malungkot na eksena
mayron ding gustong manapak tila siga kung umasta
at ang lahat ng mga yan ay sa senado nakita
6.
Ganyan ba ang dapat maging asal ng mga senador?
na mga oposisyon at panig sa administrasyon
bakit di nila gayahin ang mga senador noon
napanatiling malinis ang kanilang reputasyon
hindi katulad ng iba na mga senador ngayon
diumano’y marami ang sangkot sa pekeng flood control
7.
Di maganda sa ngayon ang kalagayan ng senado
sapagkat ang mayorya at minorya’y nagkakagulo
ang lahat ay nagsimula dahil kay senador Bato
dahil mayroong humadlang na siya ay maaresto
at isa pang dahilan ng kaguluhan sa plenaryo
ng mayorya at minorya ay hinggil sa liderato
