1.
Ang Masantol, Macabebe, Sto. Tomas at Apalit
ang Candaba, ang Minalin, ang San Simon at San Luis
ito ay ang walong bayang ang may sakop ay 4th district
taon-taon binabaha tuwing tag-ulan ay sasapit
ang mga residente sa aking lugar na nabanggit
sa kanilang sitwasyon ay malaon ng nagtitiis
2.
Mga mamamayan dito ay hindi na natutuwa
dahil kapag tag-ulan na’y nakararanas ng baha
ang kanilang kalagayan ay sadyang kaawa-awa
nagtitiis na lang dahil wala namang magagawa
mga bayan sa 4th district laging laman ng balita
dahil madalas tamaan ng malawakang pagbaha
3.
Lalo na ang Macabebe at ang bayan ng Masantol
na palaging binabaha tuwing tag-ulan taon-taon
kahit di na umuulan at maganda ang panahon
ay hindi na bumababa tubig ulan na naipon
na lalo pang pinalala ng mga pekeng flood control
kaya’t nagmistulang ghost town ang ilang barangay doon
4.
Mga pekeng flood control na diumano ay dinaya
sa bahang nararanasan ay lalo pang nagpalala
kung maayos lang sana at matibay ang pagkagawa
disin sana’y napigilan ang malawakang pagbaha
ang mga palaisdaan ay di sana napinsala
at walang naanod na bahay sa tubig na rumagasa
5.
Bagaman halos lahat ng bayan sa’ting lalawigan
ang lubog pa hanggang ngayon dulot ng labis na ulan
ngunit ang kwatro distrito ang labis na tinamaan
dahil walang di binaha alin man sa kanyang bayan
ang San Simon kapag hindi pa tumigil ang pag-ulan
malamang ay wala na ring kalsadang madadaanan
6.
Ganoon din sa Minalin, Sto. Tomas at Candaba
Sa Apalit at San Luis baha na rin ang kalsada
kung ang plano ng pangulo ay hindi sana kinontra
bilang long term solution ay malamang ay natapos na
subalit ang iginiit desilting at pagdadraga
sa mga ilog ang nais mangyari ng kongresista
7.
At dahil sa pangyayari inuulan ng batkos
ang kongresista dahil sa madalas na pagtiTIK-TOK
bagama’t may natutuwa na sa kanya’y nanonood
ngunit marami rin naman yaong mga nayayamot
sabi pa nga sa komento na tila may pambabastos
marahil ang taong yan ay di pa uminom ng gamot
