Kung ani chairman Sixto Brillantes, Jr.
Ng Comelec o ‘Commission on Election,’
Nais na sana niyang i-abolish itong
Grupong partylist na umiiral ngayon
Bago pa man niya inanunsyo nitong
Nakaraang buwan ng Nobyembre, ang tungkol
Sa sitenta’y nuebeng partylist na grupong
Puede pang sumali sa next year’s mid-term polls.
Na inihayag niya sa harap ng media
Ang kabuoang bilang na naapruba;
Singkwenta’y otso ang bale itinira
Mula sa isang daan saka labing lima
At bagama’t halos kalahati lamang
Nitong syento kinse ang na-‘retain’ bilang,
At ang baguhan ay beinte uno lamang
Sa syento sisenta’y singkong ‘new applicants’
Ay di na rin siya ‘satisfied’ umano
Sa pananatili ng partylist na ito;
Kaya nga’t kung siya ang tatanungin mo,
Ang buwagin yan ay ikatuwa nito
At nang mawala na ang partisipasyon
Ng partylist sa susunod pang eleksyon,
At tayo ay maka-pagumpisa nitong
Panibagong batas na maisusulong
At bagong sistemang higit na maganda,
Kaysa sa ganyang lalong lumobo kumbaga
Ang gastusin ng gobyerno sa kanila
Sanhi nitong ubod daming bilang nila.
Tayo man marahil itong tatanungin,
Hinggil sa partylist ay makabubuting
Buwagin na para makabawas sa ‘ting
Pasahod para sa mga Solons natin
Na wala rin naman ding ina-atupag
Ang marami kundi ang magtawid-dagat;
At manood ng boksing sa Las Vegas,
Itong kung pumusta’y perang sangkatutak.
Dala palibhasa nitong sila mismo
Ang gumagawa ng ating batas dito,
Kaya nagagawa n’yan ang kahit ano
Na ikabubuti ng sariling gusto?
Kulang pa ba naman itong bawat bayan
Ay may nakatoka na tayong Congressman
Na siyang sa atin ay kumakatawan
Sa anumang pangangailangan ng tanan?
Gaya halimbawa sa’ting lalawigan
Kung saan itong 1st District ay kay Tarzan;
Kinabibilangan ng bayang Magalang,
Ng Angeles at ng Mabalacat po riyan.
At nitong tatlo pang District sa Pampanga,
Kung saan ang 2nd ay kay Madam Gloria;
Ang 3rd ay hawak ng dati niyang kasangga
At itong 4th District naman ay kay Anna.
Kaya para ano at kakailanganin
Ni Juan dela Cruz ang dagdag na pasanin
Sa partylist group na iboboto pa rin
Para i-represent itong sektor mandin
Ng umano ay mga ‘security guard,’
Na di naman akma sa personalidad
Nitong sa ngayon dito humahawak,
Pagkat ang ganyan ay di nito dinanas
At nitong iba pa na lubhang malayo
Sa kinakatawan itong tumatayo,
Kaya papaanong ikapapanuto
Ng kung anong sektor ang ganitong anyo?!