1
Kung may nagnanais man na di matuloy ang eleksiyon
yan ang mga nasa pwestong naninilbihan sa ngayon
kasama na rin pati ang kanilang mga amuyong
na labis ang kasiyahan ng dahil sa kanselasyon
sapagkat ang BSKE ay di na raw matutuloy
na naunang itinakda ng Nobyembre ngayon taon
2.
Kaya ang mga kapitan pati na mga kagawad
sa kanilang mga puso’y walang pagsidlan ng galak
lalo na ang mga may loan na hindi pa nakabayad
at ang mga walang silbi na kapitang mandurugas
sila ay di na gagastos ng salaping limpak-limpak
sa kanpanya ay di na rin mapapagod, magpupuyat
3.
Sila ang hindi pabor na magkaroon ng halalan
dahil batid nilang sila’y di na muling mahahalal
kaya ang 2 years extension pa nilang panunungkulan
ito ay tila pagkatig ng magandang kapalaran
subalit sa mga tao nilang pinaglilingkuran
ito ay isang kalbaryo pa nilang pagdudusahan
4.
At ang mga di pabor na makansela ang eleksiyon
mamamayang nagdusa na ng matagal na panahon
ang pangunahing dahilan ng di nila pagsang-ayon
nalabag ang karapatan batay sa’ting konstitusyon
pangalawa ay masyadong mahaba ang limang taon
at sayang ang ginastos ng COMELEC sa preparasyon
5.
Hindi rin sumasasang-ayon ang nais na magserbisyo
sa kanilang barangay na ang hangad ay pagbabago
mga bulok na sistemang kailangan ng maiwasto
kung saan ang mamamayan ang siyang nasasakripisyo
ang dapat na manungkulan malinis ang pagkatao
taong mayrong takot sa Diyos at matatag ang prinsipyo
6.
Sila yaong nararapat na maglingkod sa barangay
at hindi ang mga taong ganid sa kapangyarihan
na ang tanging iniisip pansariling kapakanan
at hindi ang paglilingkod na mayroong katapatan
kung kaya’t ang pagkansela sana dito sa halalan
pagbalahura’t pagsikil sa’ting mga karapatan
7.
Ikaw ba ay tutol din sa pagkansela sa eleksiyon?
o ikaw ay isa rin sa pumapayag na matuloy?
ang ganitong katanungan ay depende sa sitwasyon
ng barangay at ng mga naninirahan sa nayon
kung maganda ang palakad lahat sila’y sasang-ayon
at kung hindi ay malamang na sila rin ay tututol
