e patugut ing uran, manibatan king babo,
kakatmu ne ing ilug, ene sana lumapo,
dapot lalung sisiri, akwa kung magtampiso,
angga nang miras king tud, kakarug ku’t maniglo.
pane yamung ilalam, tuknangan kung malati,
ni e man sementado, akit ing tagpi tagpi,
lapag na pane gabun, pag me basa e ‘gad langi,
nanu nung lumbug pa, nokarin magkabili.
sese kung animal, mañulapo’t kakawani,
ala lang pitukluwanan, atin nang mangalili,
patse e makarakap, ala nang apisali,
katayan ala na rin, danupan ing maliari.
mamasa ku nung atin, saup king manungkulan,
bisa mang mangabyayan, ing paligid limbug ngan,
sasaup king asikan, mewalang pakinabang,
kapurit sanang abias, ngeni ala ng isiang.
balamu yang tambayuk, kanakung pupusanan,
king inalkus a paud, gigiting ya king batal,
libutad ning delubyo, ini ing daranasan,
parusang tatangalan, gawa da reng manungkulan.
at sana nung kumabsi, king pane babalita,
‘lang tuknang mipañira, uli ning pulitika,
gagastus yang gobiernu, miliones king halaga,
aldo aldo ing ‘trial’, misan ala mang kwenta.
sumpa ya ba’t paramdam, niting naturalesa?
ban mituran pilubluban, manako kareng pera,
o kaya pamang-gising, memalen mimulat na,
‘people power’ nung ibalik, bayuan ing sabla sabla.
metung kung sasaingsing, baluku ‘li mu aku,
nung akwang misanmetung, dapat muring magbayu,
lakwas king pulitika, deng masabal ibotu,
e pasilo king pera, karen mang ipangaku.
nung lulbug ya ing balen, ita murin ing ginawa,
panaun ning halalan, labanang tanggap pera,
saguli mu ping bawian, king proyektong malabsa,
sabage sasabian dang, misane balang banua.
dapot ating angganan, ing pamagsamantala,
perwisyung daranasan, ing salup kakatmu na,
bangungut t’yak yang datang, kekayung nilukluk da,
nung eko bisang kuldas, panan yu king balota.
