Home Opinion Magaral tamung Capampangan

Magaral tamung Capampangan

279
0
SHARE

Masampat – masanting, malagu, alang ipintas

‘Maputi balugbug’ – curiput, masungit

Saulan – sambutan, ababawan, alupig

Macasnuc – macasora, macabuysit.

Talamtalam – e binang makirut a sakit keng atian

Malilimadmad – mamasamasa, e pa lubus malañgi

Lampin – balabal keng buldit ding anak a bayung

bait (a e na usu) – at ing capalit  na niti ‘diaper’

Sulimpat – duling, banlag at/o e diretsu mata.

At agiang sisti mu, e cu balung sabian nung bakit

ding anti careti, bista’t macasakit lub, intasang

ausan da’lang tau Minalin – kenu megumpisa?

 

Ing bage mesabi, sisti mu marahil

at iti pasari ning ‘poetic rhyming’

king ing lagyu na ken ning balen Minalin,

macarima ya iti king salitang duling?

 

Nanu pa man ing ken a e kasasanting

a epektu caring memalen Minalin,

atiu na ken, iti yanang manatiling

taguri, a e na maliaring mabating!

 

Calupa na ning ken balen ning Sasmuan

a meging taguring e na macalinguan,

nung mitiab ya’ing bangka, muna reng sagipan

ing ‘cucul’ kesa keng aliwang cabiayayan?

 

Ing ‘cucul’ ya itang mayumung tinaclub

a’ynulma keng bican, cabangal ning ngungut,

ya’ing ngara agiang misan ya malumud

casebian ali ne ibili’ing pacabug?

 

Saragati – salbahi, pilyu, maki-calocuan

Cocoronting – makitopac, sira buntuc

Laganas – calat, maski nucarin atin

Alto-lumbug – misan atiu, misan alayu.

At menasa ing salitang ‘alto-lumbug’

king tune aske na, yan keng malulumud

keng danum ning dagat, sapa o keng ilug,

(‘lilitaw-lulubug, sa wikang tagalog’)

 

Pusung – mapamiru, mapad keng picaylian

mapamatula keng simpling cabaldugan;

simpli mung bage a sabian da ren misan,

e maliaring e ta’ sagacgac mu naman.

 

Talaran – uyat ya at suling palapat

a tutubu maski keng tabang at malat,

den ila ring caring patulapit, tacap

boting ‘beer’ at ‘soft drinks’kilub nian papacat.

 

At panais da reng barberu mu naman

caring labahas da ban puminu taram,

a e ya man antimong batung  taisan,

pero subuc ya keng bage anti canian.

 

Casebian a ‘macasalampac a bili’,

adua ya parasan, aske at taguri;

antimo nung ating sigalut e wari

e ta’balu nung nu’ dapat magkabili?

 

Cadua ing literal a macasalampac

ya bitis pilatan ding sanga na ning duat,

e ya mamiligurung  misan mu calabag

cabud caren ating mesangal at sucat? ~.

~.

LEAVE A REPLY

Please enter your comment!
Please enter your name here