Kaluguran kung pamuntuk ning pakamalan kung balen…
Balen Capas a indu na ning baryu kung Aranguren,
damdam ko sa king siwala ning maluka yung kabalen
king bistaman makaba nang panawun ing ala ku ken,
panabilin ku kekayu king e ye sana paburen
ing amanung kapampangan a sisuan tamung tutungguen.
Ing Capas kapampangan ya, kapampangan la amanu
ding kekatamung pengari at nunu ring nunu tamu,
at ining mal dang salita a likwan da kekatamu
sukat at karapatdapat luguran tayang masolu,
pablasang ing katutuan na, agyang nu’ta muntang yatu
kapampangan yang dalise ing kekatang pangatawu.
Aku, mabye kung patutu king ikatang Capasenyan
tau tamung biasang lugud karing matwa tang ibatan,
inya agyang ati na lu ketang aliwang karinan
at aku makarayu ku king balen kung pakamalan,
king uli na ning amanung pepamana ra at likwan
makasuglung ku karela, ila makanyan mu naman!
Antimurin, ding kapatad, kakuyug ampon kakalu
balu rang e ko kelinguan agyang atna ku karayu;
pablasang ing salita ra’t salita ku metung yamu
dalise yang kapampangan ing king labi mabubugtu,
inya ining amanu na ning Capas ya ing patutu
katuglung na la ning bye ku, kadaya ku la’t kapusu.
Nanupata’t ing amanu anti ya waring sinulad
nung nu kasuglungan ta la ding matwa tamu’t kapatad,
ing kaparang Capasenyan manaliwa ya mang labuad
ing sinulad na ning lugud, makatali ya king pusad,
inya kabang kapampangan la ring diwa nang mipalimpad
ing panga-Capasenyan na, e mebawas, e mepatad.
Inya…kekong manungkulan ngeni atyu king upaya
ing diwa ning balen Capas kekayu ke paganaka,
ing pamikakametung da ring pusu tamu at daya
atyu king gintung sinulad ning kekatamung salita;
at kabang ing salitang yang malabung ya at sagiwa
ing pangametung tang lahi e ya mate kabang-kaba.
Balu meng balu yang balen a matibe at matatag
ing sarili nang amanu manimuna ya king tindag,
inya dapat mipabalu, mipasyag, at mibulalag
ing Capas Kapampangan ya—yan ing amanu nang maslag…
at king kaba ning panawun e ya kulimlim a sinag
pablasang ing mal tang balen e patayid kareng bulag.
E patayid kareng bulag ing balen tamung palsintan
balu nala ding malugud king salitang kegisingan,
kakandidatu ya pamu sukad dane pilubluban
nung iti tawu ya Capas o mipalili yang daywan;
uling kabud minyabi ya king sabing e kapampangan
e kadaya, e kapusu, e ya tune Capasenyan.
Kekayung atyu king tungkul e kayu sa magpabusta
palablaban yu ing lugud king sisuan tamung salita,
bustan yung ding kayanakan gamitan deng alang patna
at palabungan ne pin man ing amanu tamung Mutya
at king kaukuman Tarlac ya ing matning ibandila
kapampangan ya ing Capas king panamdam at king diwa.
Kapampangan ta panamadam kapampangan ta king lahi
kapampangan ta king pusu, diwa. dapat, at ugali;
yang ing sukat dang abalu ding ninu mang sasalangi
o karing pamilya tamu makyagum at sasalagpi
ban keta apakit tamu ing alalang matas uri,
luguran de sa’t igalang ing kultura na ning dayi.
Oyan ing panabilin ku kekayung atyu king tungkul
ing kultura na ning dayi e ye pabustan milangkul,
ing amanung pamana ra ding matwa tang peparagul
ingatan ye sa at banten ban e manabu king kulkul,
uling yan ya ing sinulad nung nuta makasapunggul
antimong metung a lahing isundu ring bayung sulul.
Katatawlyan payabut ku ing pasalamat kung wagas
king parangal a binye yu kanaku, antimong watas;
ing pepakit yung masabal king amanu tang matimyas
pupuryan ning kakung lira king taginting na ning kwerdas
Lwid ya ing kekatang balen. Misan pa matni tang igkas:
Ing Capas kapampangan ya! Kapampangan ya ing Capas!
Balen Capas a indu na ning baryu kung Aranguren,
damdam ko sa king siwala ning maluka yung kabalen
king bistaman makaba nang panawun ing ala ku ken,
panabilin ku kekayu king e ye sana paburen
ing amanung kapampangan a sisuan tamung tutungguen.
Ing Capas kapampangan ya, kapampangan la amanu
ding kekatamung pengari at nunu ring nunu tamu,
at ining mal dang salita a likwan da kekatamu
sukat at karapatdapat luguran tayang masolu,
pablasang ing katutuan na, agyang nu’ta muntang yatu
kapampangan yang dalise ing kekatang pangatawu.
Aku, mabye kung patutu king ikatang Capasenyan
tau tamung biasang lugud karing matwa tang ibatan,
inya agyang ati na lu ketang aliwang karinan
at aku makarayu ku king balen kung pakamalan,
king uli na ning amanung pepamana ra at likwan
makasuglung ku karela, ila makanyan mu naman!
Antimurin, ding kapatad, kakuyug ampon kakalu
balu rang e ko kelinguan agyang atna ku karayu;
pablasang ing salita ra’t salita ku metung yamu
dalise yang kapampangan ing king labi mabubugtu,
inya ining amanu na ning Capas ya ing patutu
katuglung na la ning bye ku, kadaya ku la’t kapusu.
Nanupata’t ing amanu anti ya waring sinulad
nung nu kasuglungan ta la ding matwa tamu’t kapatad,
ing kaparang Capasenyan manaliwa ya mang labuad
ing sinulad na ning lugud, makatali ya king pusad,
inya kabang kapampangan la ring diwa nang mipalimpad
ing panga-Capasenyan na, e mebawas, e mepatad.
Inya…kekong manungkulan ngeni atyu king upaya
ing diwa ning balen Capas kekayu ke paganaka,
ing pamikakametung da ring pusu tamu at daya
atyu king gintung sinulad ning kekatamung salita;
at kabang ing salitang yang malabung ya at sagiwa
ing pangametung tang lahi e ya mate kabang-kaba.
Balu meng balu yang balen a matibe at matatag
ing sarili nang amanu manimuna ya king tindag,
inya dapat mipabalu, mipasyag, at mibulalag
ing Capas Kapampangan ya—yan ing amanu nang maslag…
at king kaba ning panawun e ya kulimlim a sinag
pablasang ing mal tang balen e patayid kareng bulag.
E patayid kareng bulag ing balen tamung palsintan
balu nala ding malugud king salitang kegisingan,
kakandidatu ya pamu sukad dane pilubluban
nung iti tawu ya Capas o mipalili yang daywan;
uling kabud minyabi ya king sabing e kapampangan
e kadaya, e kapusu, e ya tune Capasenyan.
Kekayung atyu king tungkul e kayu sa magpabusta
palablaban yu ing lugud king sisuan tamung salita,
bustan yung ding kayanakan gamitan deng alang patna
at palabungan ne pin man ing amanu tamung Mutya
at king kaukuman Tarlac ya ing matning ibandila
kapampangan ya ing Capas king panamdam at king diwa.
Kapampangan ta panamadam kapampangan ta king lahi
kapampangan ta king pusu, diwa. dapat, at ugali;
yang ing sukat dang abalu ding ninu mang sasalangi
o karing pamilya tamu makyagum at sasalagpi
ban keta apakit tamu ing alalang matas uri,
luguran de sa’t igalang ing kultura na ning dayi.
Oyan ing panabilin ku kekayung atyu king tungkul
ing kultura na ning dayi e ye pabustan milangkul,
ing amanung pamana ra ding matwa tang peparagul
ingatan ye sa at banten ban e manabu king kulkul,
uling yan ya ing sinulad nung nuta makasapunggul
antimong metung a lahing isundu ring bayung sulul.
Katatawlyan payabut ku ing pasalamat kung wagas
king parangal a binye yu kanaku, antimong watas;
ing pepakit yung masabal king amanu tang matimyas
pupuryan ning kakung lira king taginting na ning kwerdas
Lwid ya ing kekatang balen. Misan pa matni tang igkas:
Ing Capas kapampangan ya! Kapampangan ya ing Capas!
