Aldo ning Duminggu, kayari ning misa
Ing Pari atin yang dintang a bisita,
Keng pamipagkwenta king ba’lang mibasa
Inagkat no reti ketang kumbentu na
Kabang maglakad la papuntang kumbentu
Apansinan de ring bisita ing Loru;
Memandal la reti para mag-usyosu
King mesabing ayup a aplit magsirku
“Makayama ya pu ing sese yung ayup
Ikit na ka Amung bigla yang migtunud,
Pero nandin e ya patugut mamarut,”
Ngana ning babaing karin makatanud.
“Maganaka ya yan,” pekibat ning Pari,
“Makapagkanta ya at biasang mangadi;
Pakit ku kekayu, lako ko’ saguli
King pangakulaput dening keyang tali;
Ding aduang tali a kekayung akakit,
King kaili at wanan da ring keyang bitis;
Nung ing dane kaili ing kakung inabit
Pangading Ibpa mi ing keyang idalit.
At nung ing gilyut ku ing bitis nang wanan,
Bapu Maria naman ing keyang pangadian”;
Pepakit ning Pari king ba’reng panwalan
Deting bisita na a karin dinatang.
Inia ing gewa na keya yang inigut
Ing tali king kailing bitis na ning ayup;
Iting lorung turu ikwa neng apupus
Pangading Ibpa mi, saka ya mengurus.
Makanian mu naman karas kasumangid
Iniang igutan ne ing wanan nang bitis,
Itang Bapu Maria ginale neng pilit
At kaibat, kanita biglang menahimik
Pelakpakan de ngan ding anggang bisita
Uling mekusuelu la ketang ikit da;
Dapot itang Pari kitnan ne ning matwa,
Nung nu’ anti galing ayup a sese na.
“Kasi,” ngana niti, “buri ming damdaman
Nung nanu mo kaya ing keyang sambitlan,
Sakali ding aduang tali bitis na n’yan
Ila naman detang miagnan yung kulyutan”
“Ah! E ku pa gewa yan,” pekibat ning Pari,
Pero subukan ku ba’ tamung asuri”;
Gulpi nong’ inigut detang adwang tali,
Misdan ya ing ayup migpapasag iki!
“Ika naman Among nananu ka kanyan?”
Ngana ning Loru a ginulyak masikan;
“E mu wari balu king kekang gewang yan
Magkang mayuyut ku, manabu ku talan?!”
Vhelle V. Garcia
Abu Dhabi, United Arab Emirates
February 23, 2013