MABILIS MALAGAS tangke ning panaun
King bie na ning tau a alang pagmalun;
Kalupa na mo’ ning minuran pa napun,
Bukas manabtak na ing melanging gabun.
Antimo ing bining king gabun mitalsak
Butul ya pa ngeni, lanubu ne bukas;
Mapilan mung bengi malaguang milabas
Mekad mu, sumiro ne malagung punlas.
Inia nung balak mung sumalud king ulu
Dumanun kang saklu ban e ka mabasiu;
Uling magkang e mu akua mang mangatmu.
Akua nang kapaltan king bilis na tulu.
Sipagan, nung misan maging alang kuenta
Nung king kayagapan ing tau dimut ya;
Pabalasang katutuan ing daig ne keta
Ning mayagap bina ing masipag sadia.
Anti mu naman keng mandilu king ilug
E mu naman mayap ing magurung kimut;
Pamikakatagun…paniuba ning agus,
Ing keka dinatang danum a malabug.
Agiang masipag ka nung e ka mayagap
Alang kaganapan ing bitbit mung kayap;
Uli ning ngara pin mabuluk ne’ing tugak,
Bayu ne adakma ning milalu kupad.
At uling mabilis lumipas ing sabla
King nanu mang bage binie nang Bathala,
Kamala-male mu… makaba nang bina
Ing kekang biltangan keti king masala.
Nanung atipun mu o a asikap keta?
Mika pibandian kang lasun king kaladua?
At nang’ inablas mu king Mengabus keka,
Bukud king lalu meng beyatan ing krus Na?
Sinayang mung napun a e na magbalik
Angga mu king iti e matda king isip!
Burian mu man ngeni ing sumio tumangis,
Ala nang marapat… panaun mabilis!
Nung kanitang aldo e sa’ sinira mu
King alang ulagang bage ing napun mu,
Mekilulu ka man king gayut ning yatu
Mika malagu kang disan bandang sepu.
Ngening matua na ka, magtukud at lupad
Ninung panayan mu a keka lumingap?
Antining e mu man aisip magdulap,
Tune akalukup keka minie anak!
At sinayang mu pin ing gintung panaun
Keng mialiwang pugad at alang penintun
Nune pang-malaguang kusuelu mu napun,
Kabang manugse ka liyus king tumipun.
E mu na inisip datang keka, miras
Ing likuan da ka keka mimin mu’t mayagas
At king kekaban ning biltangan mung landas,
E ka mekatakid kasakmal mang balas?
O mekad ngeni mu ganap apigunam
King alang nanu mang bakas mung malakuan?
Nune kekaban ding banua mung lebasan,
Mababo lang gulis mipinta king kanuan?!
Febrero 14, 1979
San Simon, Pampanga
