Sabi ni Lapid: EdPam at Cabigting, matinding kalaban

    309
    0
    SHARE
    Kung alam ni Lapid na ang paghabol niya
    ay di parang pamamasyal sa Luneta,
    Kundi sukatan ng ‘performance’ talaga
    at kung ano na ang nagawa kumbaga

    Sa naging tungkulin na siyang batayan
    kung karapat-dapat pang pagtiwalaan,
    Yan sa sarili niya higit kaninuman
    siya itong lubos na nakakaalam

    At ang taongbayan di rin naman bulag
    upang di mabatid kung sino ang dapat
    iluklok sa puesto at ibigay lahat
    ang tangkilik nila pagdating ng oras.

    Siya na rin naman mismo sa sariling bibig
    ng kagalang-galang na Senador Lapid,
    Na mahirap kalabanin ang ‘incumbent,’
    pero ang tigas pa rin ng pananalig

    Na makakaya niyang talunin si EdPam
    at si Cabigting sa matinding labanan,
    Bunsod umano ng ‘track record’ yata n’yan
    na aywan kung ‘validated’ ang mga yan.

    Ang tanging alam ko na kahangahanga
    at super talaga na kanyang nagawa
    ay nang isabit ang sarili ni Kaka
    sa ‘helicopter’ na noon gumagala

    Sa papawirin ng bayan ng Bacolor
    habang kasagsagan ng pagputok noon
    ng Mt. Pinatubo, at ang Gobernador
    ay walang humpay sa kanyang pag-monitor.

    Pero kung anila ang ‘quarry operations’
    ay naging maganda ang sistema noon,
    Ano’t di milyones na kagaya ngayon
    ang kuwartang pumasok diyan sa Capitol?

    Di ko sinasabing ibinulsa niya,
    pero lubha naman ding katakataka
    na ang ‘one day collection’ ni Gob Pineda
    ay katumbas na ng ‘one week’ noong siya?

    Anong reporma ang ninanais gawin
    ni Lapid sakaling siya ay palaring
    mapabagsak sina EdPam at Cabigting,
    kundi ng kung anong luma ng tugtugin?

    Na kung saan siya nahirating tunay
    at gaya ng dati niyang nakasanayan,
    na madalang pa sa kidlat sa tag-araw
    kung pumasok siya sa kanyang tanggapan.

    At kahit ano pa mang naipangako
    ay palagi na lamang ding napapako;
    Dala na rin nitong mahusay manuyo,
    pero pagkatapos bale wala na po.

    Ipagpapalit ba ng taga Angeles
    kay Lapid – na kaya lang naging ‘resident’
    ng siyudad dahil sa Mansion na milyones
    ang presyo ng dito nabiling ‘properties?’

    Kung aniya ay para lang makapaglingkod
    sa mamamayan ng maunlad na lungsod
    ng Angeles, bakit di sa Porac lubos
    ibigay ang kaya niyang maipaglingkod?

    At di kaya kagaya niyang parang nangangaso
    ang ating Senador sa kanyang estilo
    na palipat-lipat sa pagkandidato
    para lamang manatiling nasa puwesto?!

    LEAVE A REPLY

    Please enter your comment!
    Please enter your name here