Nunu king punsu

    281
    0
    SHARE

    Misan a bengi king arap ning tindahan
    mipapagkwentu la retang taung dakal;
    Ban abalu ku nung nanung pisasabyan
    sinalangi ku pa para makiramdam.
     
    Ing karelang paksa tungkul karing punsu
    at karetang taung awsan dang me-nunu;
    Ngana nitang matwang babye kuru-kuru
    king pamaglakad yu e ko bisu-bisu.
     
    Lalu pa ngana neng benging kapitangan
    ding nunu king punsu gagala la naman;
    Neng e mo akakit akwa mu lang turan
    king bistaman iti emu man kaburyan.
     
    Ing anti kanita e binang masulit
    uling antindian da naman ing matulid;
    Manyad kang pasensya a e mo akakit
    ilako dang agad ing ibie rang mesakit.
     
    Dapot ustung ika karen menyugid ka
    mabayat yang bina ibye rang parusa;
    Dakal a bage ing mengapalyari na,
    at asaksiyan da ring kakung adwang mata.
     
    Anti ing milyari kang Dorung kuliglig
    dilpak ne ing punsu meragul ya bitis;
    Malambat ya mu ring mirate king sakit
    ing meka-ulu mu i Alice Bungisngis
     
    Bukud pa kang Doru, ating miparusan
    tau ya Menila maki-kayabangnan;
    Deti kanung nunu ala lang katutwan
    bunga la mung isip ding taung mabelwan.
     
    Liran ne ing punsu, saka ne ginulut
    linakad mabilis ban agad milaut;
    Penandit kabud nia metilus a pambuk
    at akalupa de retang asung bunduk.
     
    At atin pang metung a kusang mengangas,
    a ngana ding punsu bale lamung panas;
    At pepakit niting migparagas,
    bingkalan ne iti ketang sarul gamat.
     
    Kauli na bale menimawas ya’y ti
    Mabilug katawan migkule yang berdi;
    Meskup ya salu at maybug mayataki,
    peniawad diang tawad ding kayang pengari
     
    Kabang ining matwa apilit ing kwentu na
    tahimik kami mung makiramdam kaya;
    Puera mu karetang adwang miyasawa
    a misisitsitan king kagulutan na.
     
    Ngana ning lalaki, king matwa mengutang
    nung ating manulu karing miparusan;
    Wa, ngana ning matwa mekibat marapal
    i Tatang Bestri ning sityu gaway-gaway
     
    Ala yang inulung e na apakayap
    karing panulu nang makakwa king gubat;
    Akakasabi no retang laman labwad,
    atin yang orasyun, dakal ya agimat.
     
    At kaibat nang dimdam ita ning lalaki
    marapal yang meko ketang umpukan mi;
    Ing babae namang asawa na niti
    payapa ya lukluk ketang tabureti.
     
    Meyari ing kwentu e pa mibabalik
    itang lalaki a biglang tinalilis;
    Ing kayang asawa ikwa na nang meinip
    salubung a kile, anting mabubusit.
     
    Ngana nitang matwa a keya mengutang
    “Nu’ ya wari minta ing abe mu inang?
    obat angga ngeni e ya pa daratang
    masanting siguru paintunan tane yan”
     
    Ngana ning babae a keya mekibat:
    “Ing sabi na kaku e kanu maglambat;
    imyan niamu kanu ing punsu, at kaibat
    keti ya magbalik ban muli keng agad”
     
    Vhelle V. Garcia
    May 20, 2012
    Abu Dhabi, United Arab Emirates

    LEAVE A REPLY

    Please enter your comment!
    Please enter your name here