NGAYONG kumbaga sa makipot na lungga,
na pinasukan ng matakaw na daga
ay nasarhan na ng butas magkabila,
may tsansa pa kaya itong makawala?
Ganyan ang halos ay nakahalintulad
ng kinasadlakan ng napakataras
na kakampi nina Aquino at Roxas,
matapos ikanta ni Dayan ang lahat
Ng nalalaman niya tungkol kay De Lima
na di naaayon sa kalagayan niya
(bilang dating Kalihim o Sekretarya
ng Hustisya at ngayon ay Senadora).
Partikular na r’yan ang patago nitong
pagdalaw madalas sa Bureau of Prison,
na lingid sa bayan may iligal itong
transaksyon sa Munti bago nagsenador.
At di basta karaniwang ‘inmates’ lamang
kundi mga ‘big-time-pushers’ nitong bawal
na droga at pawang mga mayayamang
Indibidual itong kanyang ‘dinadalaw’.
Na ayon kay Dayan… na nakarelasyon
mismo ni De Lima (nang kung ilang taon)
Siya bilang ‘bagman’ nang panahong iyon
Ni Mam, malaki ang kanilang koleksyon
At ‘millions of pesos’ ang ibinibigay
ng mga ‘inmates’ sa Pambansang Kulungan
bilang kay De Lima ‘protection money’ n’yan
sa ‘illegal drug trade’ ng mga ‘drug lords’ d’yan.
At ngayong lahat na ng inililihim
ni Mam, ikinanta ng kasuyong lihim
at nitong isa pang tumayong ‘witness’ din,
sa katauhan ng ‘drug lord’ na si Kerwin
Na binibigyan niya si Leila De Lima
(sa pamamagitan mismo ng ‘driver’ niya)
ng di lang ‘in thousands’ kundi ‘in millions’ na
ayon na rin dito sa ‘body guard’ din niya
(Na ni Ronnie Dayan)… sa puntong naturan
ay ano pang puedeng nitong isangkalan,
maliban na nga lang sa kasinungalingan
at paglulubid ng buhangin kung sanlan?
Aminin o hindi ng ating magilas
at ubod ng dunong nating mambabatas,
anumang gawin niyang uri ng pagsalag
sa ibinabato, sa mukha ang bagsak.
Kung kaya ang tanging magagawa na lang
ay kusang magbitiw siya sa katungkulan,
kaysa araw-araw siyang pagpyestahan
sa ‘Senate Inquiry’ at ng Taongbayan.
Lalo pa’t higit na malaki ang bilang
ng naniniwala na siya’y talagang
nagkasala kaysa mga kampante lang
at animo’y walang pakialam sa bayan.
Kaya ngayong “No Way Out” na nga talaga
ang napakatalino nating Senadora,
mas makabubuting magpakumbaba na
At ang ‘ego’ nito ay lunukin muna.
Kaysa kagaya nga ng ating nasabi
ang inaani n’yan ay hindi papuri
kundi alipusta sa dangal niya pati
kung magpapatuloy siya sa pagsisilbi.
Aywan nga lamang kung sa kanyang gagawing
pagkalas, sakali, sa takdang tungkulin,
ay ligtas na siya’t di papanagutin
ng Taongbayan sa mali niyang gawain?!
