Mga barangay chairman, aarmasan?

    606
    0
    SHARE
    Ang isyu hinggil sa panukalang batas
    Na maarmasan ang lokal na opisyals,
    Partikular ang mga punong barangays,
    Ay di simpleng bagay na kaagad-agad

    Marapat mabigyan ng pahintulot upang
    Sila’y magkabaril nang di magdaraan
    Sa isang public consultation na kailangang
    Ang boses ng masa’y ating mapakinggan.

    Bago isulong ang panukala hinggil
    Sa anila ay kailangang magkabaril
    Ang mga incumbent na barangay captain
    Bilang proteksyon sa kanilang tungkulin!

    Pagkat kagaya nga ng ating nasabi,
    Ya’y di simpleng bagay na basta pupuede;
    Nang di muna natin titingnang mabuti
    Kung anong epekto nito sa marami!

    Kasi kagaya ng naging pangungusap
    Ni Balibago barangay captain Mamac,
    Ang baril ay di po epektibong sangkap
    Ng isang opisyal upang maging ligtas

    Sa anumang banta laban sa Kapitan
    Kundi ang sa kanya’y mga nagmamahal
    Na nasasakupan laban sa anumang
    Posibleng banta r’yan ng kapahamakan.

    (Pagkat saan ka mang lupalop sumuling
    Ay tiyakang tayo’y pilit hahanapin
    Ng sinumang taong may tangka sa atin
    Ng di mabuti o inargabya natin;

    At kahit ‘criminal infested’ ang lugar
    Ay tiyakang di ka gagalawin po n’yan;
    Kasi ang respeto ng nasasakupan
    Ang siyang sa tulad mong matino iiral!)

     Kaya kung kami ang siyang tatanungin
    Tungkol sa puntong yan ay wala po kaming
    Masasabi kundi pag-aralan nating
    Mabuti ang panukala bago gawin;

    Ang kung anong dapat sa isyung nasabi
    Upang maiwasan ang ilang posible
    Nating kaharapin sa mga salbahe
    At iresponsableng lider, bandang huli!

    Di lahat ng ating opisyal, kabayan
    Masasabi nating matino’t mahusay;
    Pagkat maaaring may mangilan-ilan
    Na ika nga ay di mahapawang gatang!

    ‘Yung maka-singhot lang ng tansan ng alak
    Ay nalalasing na at di na maawat
    Sa paghahamon n’yan ng away sa lahat
    Ng makasalubong na bitbit ang itak!

    Eh kung baril pa ang hawakan ng ganyan,
    Aba’y di lalo nang nagtapang-tapangan?
    Kaya’t peligrosong ang katulad po n’yan,
    Mabigyan ng armas sa puntong naturan.

    Sa puntong naturan, mas makabubuting
    Gawing ‘selective’ ang pag-isyu po natin
    Ng armas lalo na sa kilala manding
    Mga Kapitan diyan na tipong kalasing!
     
    (May karugtong)


     

    LEAVE A REPLY

    Please enter your comment!
    Please enter your name here