1.
Aliwa mu ring lugal a malapit king kabalenan
na ning balen Macabebe ring makalbug neng kauran
metung karening barangay a makalunus mu naman
a malambat nang makalbug ing baryu na ning Tacasan
puruk singku anggang sais e ne makalto ing dalan
magbangka nala ring tau kaleldo o kauran man
2.
Ing Tacasan Macabebe king panaun a milabas
e lalapo ing ilug na agiang daragul ing atab
ing kabiayan da ring tau king taldawa ngan manibat
pamanasik, pamanasan ampon pamanyulung tugak
atin mu rin magitikan a maratun karing dayat
ampo pa retang mandayuan karing mangarayung labuad
3.
Ing baryu na ning Tacasan kanita e ya man lalbug
nung talakad ka king pampang durungdungan me ing ilug
karin kami mamandilu ampo pang mamarus-parus
iniang anak kung maintang at karin pa magkasaut
king sapang dalayap naman ke mangitig at mamukut
basta masipag ka mu sa pilming e naka dumanup
4.
Pablasang karin ya bait ing pengari ming lalaki
maralas atyu ke karin karetang kamaganak mi
mamasyal ka king Tacasan rugu king panaun ngeni
malugma ka king akit mung meging kabilian na niti
ing matindag a marangle a kanita kule berdi
liklak na ne ngan ning danum at tinubung waterlily
5.
Ding aliwang kamagnak likwan do ring tuknangan da
atin miras king Mexico, Menila’t Nueva Ecija
ding mitagan namu karin a ngeni manuknangan pa
ding kekaming kamaganak rugu a mapibabata
nung lakwan do ring bale ra o nu la pin naman munta?
lakuas king panaun ngening ing kabiayan masakit na
6.
Metung ya mu ing Tacasan karing baryung makalunus
a anti ring barangay a metampalasan king albug
sulusyun pin kaya’ing draga o desilting karing ilug?
a proyektu da ring ngening salukuyang makalukluk
pota mengari ya karing flood control a
e mepupus
a inaus dang ghost project a maragul mu ginastus
7.
Pasari ra ring flood control a pirait da kanita
ding aliwang manungkulan at abe rang kontratista
partikular king Bulacan at ding keti king Pampanga
miyapektuan la’ng lugal a e sadiang lalbug kanita
kalupa na ning Tacasan at ding baryung aliwa pa
king balen ning Macabebe a migmistulang dagat na
