1.
Sa mga barangay pala mayroon ding ghost employees
yan ang usap-usapan na palagi kong naririnig
sila yaong mga taong diumano’y tumangkilik
sa kapitan kaya ito sa halalan ay manaig
dahil sa utang na loob ang gantimpalang kapalit
may sahod din sa barangay ayon sa aking bubuwit
2.
Sila ay ang mga taong may malalaking pamilya
na kasama ni kap noon sa kanyang pangangampanya
na kanyang pinangakuang sa oras na mahalal siya
lahat sila kada buwan ay tatanggap ng ganansiya
sila rin ang prayodad at palaging nangunguna
sa listahan kung sakaling may dumating na ayuda
3.
Ang mga ghost employees ay nakaupo lang sa bahay
sa kanilang sasahurin ay matiyagang naghihintay
daig pa ang pensiyonado na laging nakaantabay
sa mga perang dadapo sa kanilang mga kamay
kaya sila’y binansagang palamunin ng barangay
na sa kaban ng bayan ay katuwang din sa paglustay
4.
Kaya tama ang tinuran ni brother Eli Soriano
hinggil sa pagpili natin kung sino ang iboboto
ang takbo ng pulitika ay wala ng pagbabago
habang may utang na loob na babayaran ang tao
sa pagitan ng botante at ng mga pulitiko
lalo na sa mga lider na tuwina’y nag-eendorso
5.
Ghost employees sa barangay kadalasang nakikita
nitong mga usisero at maging ng usisera
sa tuwing katapusan ng buwan ay palaging pumupunta
sa barangay upang kunin ang buwanang sahod nila
kung minsan ang ginagawa iba ang pinakukubra
upang hindi mahalata kumbaga’y patay malisya
6.
Ilang barangay kaya ang mayrong mga ghost employees
na sa pondo ng bayan ay kasama ring umuumit
di ba sila nahihiya sakaling may makabatid
sa kanilang kababayan na nasa paigid-ligid
ang kanilang puhunan ay mabagot sa pagkainip
at di man tinuluan ni gapatak man na pawis
7.
May mga ghost employees ba sa inyong mga barangay?
mayroon din ba sa inyo ano ang inyong palagay?
sila yaong mga taong walang pirming hanapbuhay
tuwing katapusan ay sa barangay hall nakatambay
doon makikita ninyo na matiyagang naghihintay
maaliwalas ang mukha at may NGITI NG TAGUMPAY
