Home Opinion Akilala me ing tau caring abe na nung ninu

Akilala me ing tau
caring abe na nung ninu

192
0
SHARE

Sabian mo nung ninu ngan ding parating pakiabayan mu,
At caibat: nung ninu ica at nanu ca klasing tau,
Ing sabian cu e magmintis – itabac mu caniang batu…
Antimong aslag ning aldo talus ku na ing dapat mu;

Iti king capilan pa man, pacatanda-tandanan mu
Casebian de ring macatua a mitatac king isip cu;
Ing nung nanung caraptanan ding taung pane abe mu;
Ica… antimurin naman macanian cang siguradu!

Case nung ding barcada mu… masiba la caniang alac,
Natural mu king ica man calasing cang e patawac;
Uling nung ngamu canacu keng inuman e ca mapad,
Imposible itang caren parati cang maca-ampiad;

Ing casing taung makiabe…misan pati keng e mayap
Cailangan yang makibage caring cayang maging casap;
Agawa mu wari itang caren ing e ca makiarap
Ngening deting cayabe mu keng inuman la sasagad?

Keta, nung ding parati mung pakiabayan sugarul la,
Natural mung mabiasa cang talan mu namangbaraha;
At nung keng capanecasan sane la at tutung biasa,
E melaut ing ica man mabiasa ca king balu ra;

At uling e malaut ing king maroc atake ra ca,
Mecad… e mu keng macanian mabiasa cang gawang pera;
Casebian ken – yang sugarul potang ala neng ipusta,
Canita ne maca-isip mamisali king e caya.

Nung king mapanaco naman carin ca ba’tang makiabe,
Ninung keca ing e misip king dapat na e ca mabe?
King agia mang matunud ca’t king antiti alang male,
Matucsu ca ban manaco king kelambatan yung miabe;

Itang kilub ning aldo-aldo… ya ing parati mung abe
Alang e mu abalu king calati-latian mang bage;
At alang manwala keca ing ica e ca cayabe
King nanu mang paniaptan na… tikian me yan o ali me!

Dapot ica nung king taung mayap a cararaptanan
Carin ca mapad makiabe o maki-barcada mu man,
King agia mang atin ca pang ditac a catarantaduan,
Salese ca panga-tau at magbayu pilubluban;

Natural mu king ica man macanian ca capupuntan,
Antining mayap lang tau ding kecang cacaluguran.
Ing tau akilala me caring cayang pakiabayan!
(Ninu ring abe ding Pari… e pin wari ding Sakristan?)

Pakiabayan me yang taung igagalang da ring sabla,
Alang taung king bili mu a maliaring agad mimua;
At uli ning masanting ya pamakiutus king aliwa
Pati icang cayabe na carake ca ketang tula;

E na mo’ calupa nitang pakiabayan me yang ‘sira’,
King agia mang matinu ca mirame ca caniang tatsa;
Ken me lubus akilala nung mayap ya o e tula
Ing ninu mang akayabe a maliaring icasira.

Sumangid nian munang diling paca-isipan mung mayap
Ya’ytang sana king nanu man sucat tamung mag-maingat;
Ing pamakipag-barcada, alang matsura capatad,
Balu mu lang pilinan ding nung ninung carapat-dapat.

At keca e maging dalan ban mabaldug kang Satanas,
Sana, ya’ytang akit de pa ing cayabe mu maralas,
King carelang panlalawe anghel cang maputi pacpac
At king kecang pambie-bie ditman ala lang ipintas.

At keta nung ya ing maging salamin mu oras-oras,
Iting parati mung abe, nu’ca man ken lugal miras,
Asabi kung matni keca at king yatu igulisak:
“Caya ca mie pasibayu… at mibayu pati piblas”!

LEAVE A REPLY

Please enter your comment!
Please enter your name here