1.
Neng misan ing kapalsintan, dirimla ing kayang pali ustung king pusu mitda na, ing milalablab nang api itang metipun a lugud, a tinubung anting bini kanita na magumpisang, malanat at malumpawi
2.
Pablasang ing paginakit, a king pusu matitipun
magi ngang mua kalabas na, ning mapilan mung panaun kakabas na nitang laug, ustung sapak ne king danum kelambatan lasaka’ne,
itang matibe nang tabun
3.
Ing pali ning kapalsintan, ban e lubus mangarimla karing pusu itang lugud, dapat papanatilian ya kabud iti ing mewala, masakit nang ibalik pa ing panirug a dalise, a kalupa na ning sadia
4.
Nung mengari ya sana king, aring aldo ing panirug mipampanan ya mang biga’t, king paroba ya salikut itang paling darala nang king kabengian pigkaimut karas na ning kayabakan, pasibayu nang ibugnus
5.
Dapot iti panamdam ya at ala yang katiyakan
nung datang ya o mabating, e ta balu nung kapilan inia king ban e dimla ing, pali na ning kapalsintan ing lugud pang mibabaya, karing pusu palablaban
6.
Uling nung matda ing baya, iti magi namung abu agiang nanan meng dapugan, ali mu na apatau itang pali a kaanti, na ning silab king impiernu magi yang makapangablad, a dimla na nitang yelu
