1.
Noong kami ay bata pa at nasa elementary
may asignatura noong acronym na GMRC
ang mga tinatalakay ay paggawa ng mabuti
sa bayan sa mamamayan sa pamilya at sarili
kaya sa panahong yaon ay bibihirang mangyari
ang mga pang-aabuso o ang mga pambu-bully
2.
Sa Good Manners and Right Conduct isipan ay nahuhubog
sa pagiging makabayan, makatao at makaDiyos
disiplinado ang bata hindi nagiging mapusok
malumanay magsalita at mahinhin kung kumilos
noon ang mag-aaral sa guro nila ay may takot
takot na mayrong respeto na sadyang kalugod-lugod
3.
Noong araw ang salita’t pangaral ng mga guro
sa isip ng bata’y tila ba palasong tumitimo
walang nagiging pasaway walang nagiging palalo
pag di nakuha sa tingin ay malamang na mapalo
at ang mga mag-aaral na ayaw magpakatino
ay guidance counselor na ang sa kanila’y magpapayo
4.
Ang Good Manners and Right Conduct naging sentro ng usapin
mula ng sa Tacloban ay maganap ang pamamaril
hindi pa huli ang lahat upang muling paigtingin
ang pagtuturo nito sa mga paaralan natin
lalo sa panahon ngayon maraming nakakapansin
mapusok ang kabataan at ang ulo’y mainitin
5.
Kapag nag-aral ang bata guro ang nagiging gabay
upang mahubog ang isip nila sa tama’t mahusay
subalit ang magulang ang nararapat pumatnubay
pag ang bata’y nasa loob ng kanilang pamamahay
kahit ano pa ang antas ng kanilang pamumuhay
ay magulang pa rin naman ang kanilang kaantabay
6.
Subalit kung tutuusin mas matagal ang panahong
pananatili ng bata sa pandayan nitong dunong
napakahaba ng oras na kanilang ginugugol
na kasama ng kanilang mga guro sa maghapon
ang Good Manners and Right Conduct ay sadyang napapahon
na pairalin sa ating mga paaralan ngayon
7.
Ang pamamalo ng guro’y bahagi ng disiplina
upang bata ay ituwid sa pagkakamali nila
ngunit sa panahon ngayon ito’y pinagbabawal na
dahil baka child abuse pa ang ikaso sa kanila
ang mga batang pasaway malabo ng magbago pa
kung ang hapdi ng palo ay hindi nila madarama
