NUNG WARI king Aldo malaginto aslag
potang iti ume yang sunlag neng abak,
anti yamu naman kaniti katindag
kang ‘Nanay’ at ‘Delta’ ing malagung bukas
At ning dikil para king parasan da ren
a migit e palak pa mekad king Eden
itang antimo ing aslag ning Aldo ken
malino suporta ding mal ta’ng Kabalen.
Pablasang nanu pa ing panintunan da
ding memalen keti mabilug probinsya
king klasing serbisyo publikong bibye ra
ding liping masuyu keti king Pampanga?
E king ining maluka yung talasuyu
mangampanya ya o anting magsipsip mu,
nun’e sasabyan na ing maslag a tutu
ban iparas karing sukat makabalu.
Uli ning e anti mo waring insultu
karing miluluk na ken king Kapitolyu,
ilang dakal dili mialiwang proyektu
a pepagawa ren king probinsya tamu.
At agyang dakal la ginamit a pera
keng panaun na ning pamanungkulan da,
pero malinis ngan ing egana-gana
at ‘accounted’ basi king ‘ruling’ ning COA.
(At e anti karing popular a siyudad
ken king NCR a nu’ menasa ‘corrupt’
la ring menungkulan, inya pati anak
ding aliwa karen linto mapanekass!
At balamu nganing kasebyan makatua
ing mamate danup ketang kabilyan da,
uli ning den agyang mikakapatad la
king meto’ tinape milulutlutan la).
Pero nung anti la karening paksa na
ning opinyun tamu ing ‘punto de vista,’
agyang ila namu angga na king angga,
e ta’la sawan den uli ning mayap la.
At pawang king Balen mig-serbisyung tapat
umpisa king Inda angga karing anak,
a nu’ mayayakit ing malino bakas
ning pamangubyernung dalise at wagas.
At nu’ angga na pin ngening salukuyan
ala ta’ng matsurang abusbus nanu man
king asna kalinis dang pamanungkulan
king sariling balen at king lalawigan.
Inya nanu’t keti kekata Pampanga
manintun tamu pang ken akapalit da
king Capitol ngening ding anti karela
subuk la gelingan talan manibela?
At bibye da reti ing karapatdapat
ipagkalam karing mangailangan lingap
ing serbisyong alang kapalit o angad
nun’e ban ing balen lunto yang matatag.
I ‘Nanay’ antimong Bise Gobernador
makapagbalik yang pihu king Capitol;
At maging i Dennis, bilang Gobernador,
ing tsansang sumambut ya binang maragul.
Karing Bokal ken king 1st, 2nd, 3rd District
den pihu la ngang king puestu ra magbalik,
puera mu kang Pol at Nestor king 4th District
uling den atin lang kalaban maigpit.
Inya reting adua nung e la mabalag
keng Mayo’ng daratang – matning agulisak
ding talataguyud king gubyernung mayap –
“Abak na,” e ta’na paypagal lumakad!
