1.
E ka sukat magadua lub, ibalaus mu ing takbang e ka miras king ayan mu nung pane kang mikelangan.
Ilele mu pa ing takut, malaut ka pa lakaran,
ing takut, nganing kasebian, atyu mu king kaisipan.
2.
King keka sang pamaglakad e ka lubus mamalagua, ding milalung mamirapal malalam lang matatapa.
Mayap na ing magmanene basta makapilmi mu sa, liwas karing magmabilis, ing takbang da naman lisya.
3.
Alang dagat a malalam ing e mu agawang kawen, nung manalig kang agyu mu at pangangasan mung lawen.
Ing maging sumbagal keka itang nung kekang paburen, ing e ka pa man sinungab papaylumud na ka karen.
4.
Ukyatan mo ngan ding bunduk makananu la man katas, gawan mu ngan ing agyu mu at mukyat kang miamasamas ing nanuman pisakitan maging maulagang lakuas,
nung bayu me iti ikua petulu kang daya’t pawas.
5.
Ustung maybug kang payali subuknan mung pasibayu, nung agyu da ring aliwa, isipan mung mas agyu mu.
Nung mituag kang siam a ralan, tikdo kang makatalibu, angga na king akua mu ne ing tagumpeng mitmung yumu.
6.
Ganakan mo ring sinaup aniang miraragsa na ka, e mu asadsad ing laban nung e mu king antabe ra.
Balikdan mu ing masabal da ring miduang gamat keka uling ing e babalikid e ya miras king ayan na.
7..
Potang ding adua mung bitis tuklu no king pekatuktuk, ing damdaman mung palakpak, e mu paparas king buntuk.
Manatili ka king gabun, atiu ka man king taluktuk, e sukat ing tagumpe mu, itas na ing kekang puluk.
8.
Kabang puputung de keka ing laurel na ning tagumpe, king diwa mu ing milabas ayalben mung anting sine.
Kanita mu abitasa, ikua mu ing menagumpe,
uling ala kang irungan karing pagsubuk na ning bie.
PL Rodel E. Gozum
27 Noviembre 2025
San Simon
