Home Opinion Sapatus a Laun

Sapatus a Laun

206
0
SHARE

USTUNG malapit nang miras ing kapaskwan
Eku alisyan ing aganaka ku’ytang
Kanitang idad ku pamung labing anam,
Atin yang pengaku kanaku i Tatang
A mikintal kening kakung kaisipan
Ing inggil kaniti, kaku minye aral

Keng katandanan ku magpasku kanita
Inyang i Tatang ku akasubwanan na,
Sali na kung bayung sapatus a goma
Kabud detang bonus a panenayan da
Maranun lang mibye antimo ing sadya
Apulung aldo pa ing panenayan ku

Bayu miras itang petsa beinti singku,
Malino kung dimdam king sumangid kwartu
Ding kakung pengari pisasabyan da ku;
“Nanu kaya” ngara’ing “sabyan ning anak mu
Nung e te’ asaling sapatus a bayu?”
“Nanding manga bandang alas kuatru” ngana

Ning kanakung Erpat “memakbung ing welga
Ulining palakad ning kekeng kumpanya,
Sobra king kaigpit ala nang mibata;
“Isanla ku ne pa ing relos” ngana pa,
“King ba’ keng apuntan i pareng Carlos ta”
Ing kumpare nang yan a keyang amanwan

Barkada neng anak a kakung tegawan,
Nung bakit ayan ne e ku balung sabyan
Pablasang ala neng sinabi pang dakal;
Basta ing balu ku at tawli kung dimdam
Magpasku ke kanung malangi paritan.
Din’tang ya i Tatang madadalumdum na

Atin yang mapilan suput a darala;
Malino dimdam ku: “Maasakit ya pala
I kumpare at e nya naman magobra,
Pero makanyan man, i kumpare” ngana,
Atin yang inabut a pang noche Buena”.
At kaibat, i Tatang sinabi na kaku:

“Dininan na kung pera ninong Carlos mu,
Pero pabustan mo pamu kang ima mu;
Bilang para gastus kabang gipit tamu;
Bukas, ngana kaku lumawe ya kanu,
Panyaling sapatus a kakung pamasku.
Malak-malak na ku mata, at pipiling

N’yang e ku mibata agad kung tambing
Nung batingan ko’man paintunan da ku rin
At kanita ra pa aisip marahil,
Inya miglayas ku pauli namu pin
Nitang pangaku rang tenge na ning angin.
Kabang maglakad kung anting maglimayun

Mipaindalan ku king maragul a mansion,
A nu’ masigla at dakal la ring taung,
Arapan na mismung ning bakal a pasbul;
Linapit ku’t anting mewiling migmirun
Nung nanu iting masayang pamitipun.
Dinatang ya pala ing peka-mabandi

At tanyag a pilantropung kabaryu mi;
Malwat a panaun e mumuli keti
At king Amerika la meratun deti;
Kayabe neng dintang anak nang lalaki
A ngara metung yang anak a maswerti.
Pablasang ‘ya kabud ingtalapagmana

King egana-ganang bage pibandiyan da,
Mupin king ikit ku melunus ku kaya;
Uli na ning agyang tsinelas mu pala,
E na asulud n’yan uling pikosyu ya,
Nya mas maswerte ku kesa king bili na.
Kabang aku agyang tsinelas lang pudpud

King kakung kabilyan atin kung asulud,
E anti ya ‘tin yang panyaling sapatus,
Pero e ne man malyaring magsapatus;
Aku, agyang laun lang sapin, malaus
Na kaku ing Pasko,,, e ku sa’ titisud!

LEAVE A REPLY

Please enter your comment!
Please enter your name here