Salapi ikang mayupaya

    322
    0
    SHARE
    Salapi ika pin. . . ikang mayupaya
    Keti babo yatu ing buri mu’t nasa,
    King di’t mung pinandit alang pangakabla
    Ing anggang utus mu tuparan ding sabla,
    Maging ninu yamang matas a upaya
    Ing kekang lapitan duku yang paybaba.

    Lon mung upaya mu . . . ibat pa king ibat
    Nung inya ing Guinu king krus ya mebatbat,
    Uling ketang Hudas kekang peparapat
    Pisali ne ing Dyos inya kayang depat,
    Ibat na kanita iti yang merapat
    King kekang upaya alang makasabat.

    Ngara ,keting yatu dangala’ning mabye
    Maulagang dili kareng sablang bage,
    Karing tau kanu dangal nung miwale
    Agyang mabye yaman mistula neng bangke,
    Dapot mayayakit nung ikang kalibe
    Agyang king impyerno tuki lang makyabe.

    O yan lawan mula ding keka manintun
    Agyang dumalan lang dusang susun-susun,
    Akwa raka sanang king palad a datun
    King bukut a landas matula lang tuntun,
    E bala karela’yng mipuk king pagmalun
    Nung ikang abe rang tulandung king aun.

    Mipate pate la ring mikakapatad
    Ulina ning tuksung karela mu natad,
    Utus mu king metung kayang maging hangad
    Karelang pibandyan solwa’na’t ilingad,
    Sampat ning pamyutus nung inya mepatad
    Keka yang pinutut tatalnan dang kawad.

    Kanyang kekang utus ampon kayupayan
    Karin la tutuki ding taung keraklan,
    Uli ning nasa rang bulsa rakat kwanan
    Pagkapilitan da ing sablang paralan,
    Makamate . . . manako yan karelang gawan
    Bista man balu rang iti kasalanan.

    Ikang mayupaya, IKA PIN SALAPI . . .
    Keti babo yatu . . . king sabla mung buri,
    Ninu yamang tau makapyak yang tuki-
    Pati dangala’na ibye nang pisali;
    Ding utus ning Guinu mesira’t mepakli
    Uli ning upayang kekang pepasari.

    LEAVE A REPLY

    Please enter your comment!
    Please enter your name here