Pamagaral

    95
    0
    SHARE

    INYANG papagaral na kung pang tatang ku
    Ing bage mesambit e ku pa sikasu
    Bista’t sasabyan dang maralas kanaku
    Iting edukasyon sukat yamu kanu.

    E ku paniwalan uling e ku abut
    Itang panaral da king isip kung dimut;
    Mas pinili ku pa ing makipamalut
    At mamamanasan karing sapa’t ilug.

    Uling melibang ku, e ku apansin man
    Dagus ning panaun, marayu ne disan;
    Megisan ing gabun ala nang pitamnan
    At den namang ilug meritak la asan.

    Ding akayabe kung magaral kanita
    Masanting no bili ketang kabyayan da,
    Samantalang aku agyang nu’ku munta
    E ku matatangap king nanu mang obra.

    Nung ing kausukan ding kakung pengari
    Pekirandaman ku’t peulagan iti,
    Masanting na sana kabilyan ku ngeni,
    Matiwase isip at e ku sisisi.

    Makananu na la dening kakung anak,
    Nung e la magaral karas na ning bukas?
    Maging kalupa kong’ king kabiasnan lubas
    Lipang-lipang isip king pamanarampas?

    Inya karing sablang anak a magaral
    Ing milyari kaku e yu pakiapusan;
    Kabang agyu da ko muring papagaral
    Ding kekong pengari kekong pagsikapan.

    Uling ing panaun kabud yang linabas
    E mu ne malyaring igutan payatras;
    Ing katuki niti pane niamung bukas,
    Ala ne ing napun, meko neng tinakas.

    Vhelle V. Garcia
    January 22, 2014
    United Arab Emirates

    LEAVE A REPLY

    Please enter your comment!
    Please enter your name here