LINSUT NO ding bayung suling kapanayan ding poeta,
Poeta ning indung balen a malugud king kultura;
Kulturang e mekalingwan a kabang bie liguran da,
Liguran dang alang sawa pati na ing sabing mana.
Sabing mana imbut tamung lumabung at mamutaktak,
Mamutaktak karing bunga a pamana karing anak;
Anak na ning lalawigan ban karas ning aldo bukas,
Bukas ila naman deting king amanu munye lingap.
Lingap a meging dalan na ning pagnasan dang tagumpe,
Tagumpe da ring makudta king amanu rang sinese;
Sinese rang mipnung lugud karing pusu medalise,
Medalise king lugud a kapilan man e na mate.
Kamatayan e sumbagal ban matda ing kapagnasan,
Kapagnasan ding mapuri a poetang Kapampangan;
Kapampangan kabang ating sisibul a kayanakan,
Kayanakan a lumingap king amanung kekeng lakwan.
Lakwan mila ding kekaming kawatasan a kinudta,
Kinudta mi at ginale karing bandi mung kataya;
Kataya ming ken sinimpan at pinugal karing diwa,
Diwang gintu a magdiktang bigkasan ya karing dila.
Dila da ring bayung suli a masikan deting yagkas
Yagkas de ing amanu mung matarling dang gugulisak
Gugulisak, pagmaragul, kapilan man e malasak
E malasak kabang ating bayung lalto suling watas!
