Home Opinion Nung ala kang perang dakal,e na ka magnasang tagal

Nung ala kang perang dakal,
e na ka magnasang tagal

583
0
SHARE

OREN, maranun la pa keng maggagatas
Ding keng pulitika, maki-alkas-alkas;
Atin nang laun at ngeni pa sumabak
King larangan na ning pialung a marinat.

Ating ken a e mu migit siyam a banwa
Nang meging alkalde  mekapagbalik ya
Ngening ining bayung alal, rugu wayta
Pansamantala reng kildas king puestu na.

Ing peka-primerang alal a konsehal
Yang meging ‘vice mayor’ kapalit na bilang
Ning bise  alkalde a linukluk namang
Mayor kalili kinuldas marapal.

<span;>Mibalik ing sadiang tambalan ding adua,
<span;>A nu’ ing bise keng sipag, ing menasa
<span;>Pati e na obra yang gaganap kusa
<span;>Nung e re akapkap ken ing sukat gawa.

A mangabaldugan king liban na niti
Balu nang mistula king keyang sarili
Ing dapat nang gawan at e yalig iti
Karing kalupa nang king balen magsilbi.

Tune at matapat a pamagserbisyu
Ing keyang parasan para king gubyernu
A e ra kalupa bitbit a prinsipyu
Ding pansarili ra ing balu rang pihu.

At pabalat bunga mu ing mayayakit
Karing dakal a nu’mu pin neng malapit
Miras ing alalan karin la malambis
At lalto ganaka king aske pirait.

Atin mu namang ken pane masasambut
Pero ditman iti e tatabang a lub
Tatagal at lalu pang titibe dungus
Keng pamakipagkal king ba’yang sumambut.

Tabalu mu pin nung baket sumangid na
Ning paninap niting maging konsehal ya,
Kalmang siwal ampon saldak-pangisnawa
Ing keya parating makayambi keya.

Kabang ding aliwa a misuerting mipuk
King paninap deti’t nasang mitaluktuk,
Oren, king agya mang ngara e makatud
Ing pamanyaptan da ila ring manyambut.

Ing bie pulitiku, keng dimut kung balu,
Alang keliwan keng tambubung at piku,
A nu’ kabud pin ken adalpak me rugu
Ing gulis pihu kang ilele ra pamu.

1988 nyang ing metung kung bilas
Migpakasubu yang tengu na ku’t sukat
Itiket ban maging konsehal ning anak
Nang Tang Jose, Jr. (mepilit kung tinggap).

Kanita ala pang antimo ing ngeni
A binang magastus ing anti kaniti;
Mig-nomiru uno ku keng partidu mi
Di Glenn Yabut, a nu’pin mesambut kami.

Kwarenta’y otsu kaming milaban-laban,
Migpang-labing metung ku king kabilugan;
Manibat kanita e na ku tinagal,
Uling pera-pera na pin ing labanan.

At nung atin ku mang pibandian siguru,
King bage anti yan – paysubu ali ku,
Adua kapupuntan ing bie pulitiku:
Mikwalta o lalu ka mung mangalulu?

Eku naman buri ing kaku malyari
Mangadimanda ku mung pihu nung pati
Perang munisipyu kakung pamaugi
Ba’ku mung milukluk antimong Alkalde.

At/o kaya agyang bilang konsehal mu
Uli na ning ngeni kalakaran rugu,
A nung ken ala kang ibaldug keng buslu,
Asus, asus e na ka dapat paysubu!

LEAVE A REPLY

Please enter your comment!
Please enter your name here