Home Opinion Ninu i Juan Crisostomo Soto

Ninu i Juan Crisostomo Soto

1124
0
SHARE
I  Juan Crisostomo Soto, macudta yang Capampangan
periodista, zarzuelista, at poetang matenacan
meging talapanulip yang, amanu ning sabing menan
at bpa ning kecatamung, literaturang mahalan
ing badbaran ding poeta, a inaus dang CRISSOTAN
metacmus ya ketang “CRISSOT”, a gewa nang talipanpan
tagle ne ing pecamatas, diling antas ning capurian
caring sablang talasulat, ning kecatang lalauigan
Mibait ya ketang petsang, beinti sieti  ning Eneru
banwang libu walung dalan, anam a pulu at pitu
king baryu ning Sta. Ines, Bacolor ning labuad tamu
ing bale’nang pigcasautan, nung nu ya mibantug ustu
uli ning sakit king pusu, peinggulut ya king yatu
king calabing-aduang aldo, a  bulan na nitang Hulyu
banwang libu siyam a ralan, naman ampon labingwalu
ketang cayang catalasang, idad a singcuenta’y unu
Ding mapilan cauatasan, a canita na sinulat
cumedya la’t, zarzuela, ampon cuentung mangacuyad
calupa ning “Pula’t puti, ampo  ing “Lydia” pamagat
Perla, Zapre ampon Rubi, saca “Ing perlas king burac”
ding megi nang talipampan, ketang cayang pamaniulat
CRISSOT, RUBI, NATIS BELEN,  VITALIANO”t, LACAN BATBAT
pasari ring cayang cudtang, mapinu pangabalangcas
anting duldul a meramdam, ing lagyu nang mibulalag
Ing bie nang milabas CRISSOT, nung kecatamu yang batyon
macule ya at mipnu king cadakilan ampon onor
bucud caring palabas nang,  ya mu naman ing director
megobra ya king gubyernu, bilang deputy assesor
megi ya namang sundalus, ampong guerillang mabalor
king upaya ning heneral, a i Maximino Hizon
at ing “Noli Me Tangere”, a misulat king español
linicas neng Capampangan, niting anac ning Bacolor
Kng zarzuelang “ALANG DIOS”, pipula’na ing tagumpe
a angga  king salucuyan, maralas dang  ipayalbe
ring melacua’niting sapni, ban magambul masalese
ing pamana na king laji , a kecatamu na binie
at ing dulang sinulat na, kang Shakespeare de pekiarle
a pemansaga’na namang, “PAMAKIASAWA  NING METE”
Ing “SIGALUT”, misulat ya, canitang macasucul ne
a dikil king cabayanian, ing istoriang metalake
Adua la pang sinulat nang, sasaglawe cadakilan
ding cabalen tang ginusal, king mibabayang  labanan
at ding inampang na niting, masampat a cauatasan
ila ring “Paniu nang Sitang”, at “Anac ning Katipunan”
ing tauli na namang cudta, bayu migpiac panimanman
itang “Nanu ta’ng male cu”, a pilit nang peki-arian
I CRISSOT tikian de bacas, dening  “SAPNI” nang  melacuan
a malugud  king amanu at culturang Capampangan…
Ding SAPNI NANG CRISSOT ngeni, ila pin ding manibalâ
caring cayang cauatasang, pigpuyata’nang kinudtâ
ing pake ra ban canita, pasibayung maniagiwâ
ing amanung mecalinguan, caring isip ding aliwâ
antimurin ban canita, ing culturang miraragsâ
at tradisyun, talacad la, ketang bili rang malugmâ
saupan ta la ring “SAPNI” na, king carelang pamaminguâ
king amanu, king cultura at tradisyung mesambitlâ…
Vhelle V. Garcia
March 8, 2019

LEAVE A REPLY

Please enter your comment!
Please enter your name here