Misan a Duminggung ibat kung sinimba,
Ikit ke’ing apu ning classmate ku kanita,
A meging girlfriend ku nyang high school ke pa,
At e ku akalman a meging asawa.
Pasari ning e ku kuntentu keng metung
A kekaburi nyang ken ku pang high school,
Nung inya mitali kung asna karanun
King babaing e ku kepalsinta napun.
At makanyan kaming e mipagkaluat man,
Mikawani kaming dalan a biltangan;
I Sion, mebalu ne, metung ya anak yan
Dapot mikakunu keng miuman lapitan.
Pero ngeni uling ining keyang apu
Abalu na kang Sion ing ninu pin aku,
Ya’pa ing mitutus paglolon ke kanu
ban e ya malungkut king bie nang mebalu.
At nandin pin kabang kilub ning pisamban,
Magmisa ya’ing Pari, i Sion aplit nemang
Manguku at pane itang kayang sigam,
Kabang aku anti ku mong paglapakan.
Masakit kanaku ing kaku yang akit
King makanyan i Sion, nung inya mepilit
Kung linual agad at keni ke pin mikit
Ning keyang apu at kaku na sinitsit:
“Makalunus neman rugu i Lola mu,
Nandin ya pa aplit manguku pin” ngaku;
“Lolo, magparamdam yamu y Lola ku,
Uling balu na pu ing sinimba kayu!”
Dimdam keng kinutug kabubuslan salu
Ing sadyang malumbe a kanakung pusu
Ngening king apu na ning sinta kung tutu
King yan atin ya pa agyang kapurit mu,
A sintang dalise. malinis at banal
Nung inya king bie ku ya e kia mu naman
Busal na ning salu leko ing larawan
Ning malugud kaku, a sinta kung hirang.
A nung nu’ inya mu mikandayu kami
King uli namu ning ding keyang pengari
Pekikasundu reng pakikasal iti
King ditman a e na liguran lalaki.
Makanian man bayu ing aldo ning kasal
Tinakas ya’t akung keyang pekikitan,
Bigung kalma, iti – ikua reng atagal
At simsam kanaku at e mekalaban.
Abalitan ku ing pekalaut-laut
Ne ning asawa na, angga king mepatlud
Ya bie ing lalaki, den metung ya kabud
A meging bunga ning e singkapan lugud.
At napun pamu pin miras ing balita
Ing sinta ning bie ku minuli yang bigla,
Inya agyang eku mapanyimba, kusa
Kung sinimba banting ya akit kia’mu sa.
King mipmung kababan lub at kakusuelu
Pasitsit sinabi ku king kayang apu,
Nung e na ikamua kaya lumapit ku,
Kabud mu timan ing pepakit na kaku.
Mangabaldugan mu ing e ne pa sera
Kanaku ing pasbul ning pusu’t kaladua
Ning dalise lugud, at king oras a ita
Siklulu ke at king arap altar dela!
