MILABAS ing Pasko at ing Bayung Banwa,
Pati Paskong Atlung Ari, ali ta’na
Ikit kang ing Ima kalupa ning sadya,
A kekatamu ngan kusang gagawa na.
Kanita, nanu mung okasyun ing datang,
Itangan, matula na’katang agkatan;
Lalu na neng Aldo niting Kebaitan,
Ban akasulu na keng makabang dulang.
At kaybat, e ta’man kang Ima manyawad
Pang-tricycle, ya ing kekatamu agad
Kusang mamye inya ita’ng keyang anak
Alananti’ing keya tamu pasalamat.
At agyang e ta’ya kayabe nung misan,
I Atsi ing kayang madalas tuburan
Ban king bale nang Max pakanan paugtwan
At/o kaya agyang magminindal mu man.
Alang paglulanan ing maglapo tula
Karing salu tamu king sobrang ganaka
Ning Indung kekata’ parating masaya
Nang pamakirungut a’yalang pigawa.
Nya makanyan ngening e ta’ balung sabyan
Nung baket balamu ing kekata sadyang
Panalala’t lugud na biglang metabang,
King e ta’ male nung nanung kasangkanan.
E kaya uli ning aliwa na, Ima
Ing keng pasbul mayul ngeni mangasiwa,
Inya anti tamung mipimpin mung bagya
King suluk ngara pin ding ‘brod’ ta’ng aliwa?
O likas anti yan ing bie keting yatu,
Ing egana-gana ating pun at sepu;
E uling kanita pane ing kuswelu,
Yan alang kalibe lungkut a masolu?
Pero male tamu magkang kabud namu
Ima yang kekata mismu pepasundu
Banting pasibayu ta’ng mikalu-kalu
Para king parasan a pekamalagu.
Okupadu yamu mekad keng obra na
Nung inya marahil medyu melibang ya
At king pusu’t diwa na anting miligta
Ing kekata lugud na at panalala.
Pengaring malugud karing keyang anak,
Alang panayan a nanu pa mang ablas;
Isubu na namu ning Ima, maralas
Ibie na, ban e la sumala keng oras.
Pablasang ing tune malugud a Ima,
Yan karing supling na – ala’ng e agawa;
Karen ibie na ngan ing suporta’t sabla
Ban mitiwase la at mie mapayapa.
“Alang kayangganan ing lugud ning Indu
Keka, o penganak supling nang tinubu”:
Nganing kantang para kaku, ya ing tutu
At sukat ipunla kabubuslan salu.
Ing alang kupas a lugud ning Indung mal,
Iti, king bie tamu e dapat pagdudan,
Nune itanam king pusu’t kaisipan
Ima, e magbayu king kapilan pa man!
