Home Opinion Kapanayan ning balen,atyu gamat ding memalen

Kapanayan ning balen,
atyu gamat ding memalen

178
0
SHARE

E ANTING insultu kang Digong Duterte
A kagalang-galang (kanung) presidente,
Ing kakung sabyan a dakal nala ngeni
Ring e na matula keng ugali niti.

Antimo’ing sabyan ne salitang e dapat
Arap ning publiku kabud na’na igkas,
King agyang balu nang iti makapintas
Keya bilang lider tamung pekamatas.

Mapamalmura yang  alang pakundangan
At e ya mamiling okasyun at lugal,
Nung inya pati na ring ken keya ‘loyal’
Memagpatumbalag lang patunggal-tunggal.

At uling marahil  personal interes
Ning balang metung ing maging ‘vice president’
At ining Duterte ya mu namang target
Nyan at ila mismu ken ding mipag-‘eject’;

Nanung e’na lakwan Digong keng gobyernu
Mag-anam  neng banwang presidente tamu?
(Kagalang ken la pin maging bilyonaryu
Ding keraklan karing ngeni pulitiku?!)

Ing ngana dinan de mang beinte anyos pa
King ngeni, puestung ken a pangasiwan na,
E na apatpat ing dakal a problema,
Obat babalakan na pa ing tagal ya?

E kaya uli ning anti nang akakit
Ing ya mirame yang ken mangasipit-sipit
Karing tulisape keng ‘Department of Health’
A mikutkutsaba keng pamamirait?

A e na alingad, panakpan nia’y Duque
Ampo i Domingo king miyaliwang bage
At matning asabi kung kelan marine
Nung suryan banayad at keng legal ike?

E ku nasang sabyan iti malaram ya,
Nu’ne e ya biasang kasalita pala;
Ing ‘Endo’ a metung karing pengaku na,
Oyan migmistulang yelu keng karimla.

At marahil iti ing sangkan nung bakit
Keng pamanungkulan bisa yang magbalik
Ban keta sakali’t yang mag- ‘vice president,’
Kanita na palto ing e ta’pa ikit?’

A nung madedbol ya ing tutuking lukluk
Antimong ngara pin a maging pamuntuk,
I PRRD yang ken miuman milukluk?
Sana, ing Ginung Dios, e na ipahintulut!

Busten tamu waring keti magdatila
Ing alang direksyon a pamamahala,
Ning taung asna king talusad a dila
Nung mangaku pero, yan e na agawa ?

O king ining ‘REVGOV’ a metung mu naman
Karing pengaku na bilang pamalit nyan
King salukuyan a pormang kapamalan,
Yan angga na ngeni e na atuparan.

Kemaulyan bola at bola kamatis
Ngana pin ning lider ding maglasakit,
Isulung ing ‘REVGOV,’ at ding ipamalit
Sana pin pawa lang maki-malasakit;

At e la anti ring ngeni a mas dakal
La ring ‘Ali Baba,’ nung inya ing Kaban
Ning Balen agisan da ne malinamnam
Ding kampun ning atyu ken king Malakanyang?!

LEAVE A REPLY

Please enter your comment!
Please enter your name here