Kabang

    160
    0
    SHARE

    Kabang ating dapu ampo pang galakgak
    Karing manungkulan keti Pilipinas,
    Angga na king muti la bulbul ding uwak
    Ala tang’ malino kararasan bukas

    Kabang ing bangan a datukanan pale
    E re patugutan, buburikyan pane
    Ding kampun ning dyablu a alang marine,
    Nanu pang mitagan sukat ipagkabye?

    Ala na! pablasang ninap da na pin ngan
    Pelalung latak ning karin makasimpan
    Inia nanu pa ing dapat tang’ asahan
    Nune kimut na king sariling kagiwan?

    Datang ing panahun, manatul ya’ing Ginu
    Karela ngan miras ing anggang kalbaryu,
    Mekad y Taning man a karelang Amu
    E na no’ tanggapan karin king Impyernu.

    Uling king karelang tagle katakawan,
    Maging y Luciper e na no’ tanggapan
    Pablasang pati na tronu nang luklukan
    Magkang neng ganid la keya re samsaman.

    Makanyan ya ngeni kabilyan ing bansa
    A pemugaran da ring taung masiba;
    Angga la kapilan deti magpasasa?
    Kabang iting balen e pa makaragsa?

    Kabang ating taung susulapo isip
    A miyayambunan king grasyang kapurit;
    Kabang dakal la ring alang malasakit
    King Indung Balayan a mipapaidpid

    Kabang dakal la ring magmamatudturan
    A e matatagkil a kapanandaman;
    Kabang ating taung silo panimanman
    King kislap ding perlas at gintung makinang

    Kabang ating taung masasali botu
    At manungkulan ding e dapat mipuestu;
    Nung akakit da man gawa rang e ustu,
    Nanung karapatan da pang magreklamu?

    Nung ika metung ka karing mesaglawe
    At manalig mu king parati rang pamye;
    Atin ka pa mo pin kayang bosis, abe
    Ban salangsangan ing matsura dang pake?

    Ala na, uli ning ika mebayad ka
    King karapatan a seli ra na keka,
    At balamu asu na ka mu karela
    King asna kababa a panlalawe ra.
     
    Inya keng tutuki misip kang banayad
    Nung ninu talaga ring ibotu dapat,
    At ding balu tamung mapanyapat mayap
    Ilang king balota piabayan isulat.

    Uling kabang alang pamisasanmetung
    King mayap a nasa bigu ing panyulung,
    Inya ban matupad kekatang ambisyun
    Painggulutan ta’ na ing maling desisyun.

    Nanu la ring ustu a sukat marapat?
    Pilinan nung ninu ring karapat-dapat;
    Kanita ta’ pamu mituntun king mayap
    At mirinan dalan ing gintung paninap!

        Neng Vhelle V. Garcia
        Abu Dhabi, United Arab Emirates        August 21, 2011

    LEAVE A REPLY

    Please enter your comment!
    Please enter your name here