Insanu karela ing mas mikasala?

    284
    0
    SHARE
    (Kaugne ning panaun ning Semana Santa, iting poesia a makiadle matapat a kasalpantayanan ya pamung yampang ning maluka yung talasuyu para king malugud yung pamamasa)
    Y Pablo at Pedro a parehung kosyang
    Apiyagkatan da ing simba lang miagnan,
    Misan a Domingung panaun ning tamnan
    At magpakati lang danum ding keraklan.

    Bayu la miras king plaza na ning balen
    Makaba-kaba ya dalan dang baleben;
    At king patio mismu ali la miras den
    Nung e la mamaltang karing pilapil ken.

    Ing pamituki rang mabilis panlakad,
    Biglang mipayasdal, anti waring sebat;
    Uling amatan do’ libutad ning dayat
    Ding asan a dakal a karin lalatuat!

    “Itu at bulig” ngana nining Pedro,
    “Nung e to’ kuanan den masayang lang pihu;”
    “Aba” ngana namang mekibat ning Pablo,
    “E ta’ gagawan yan, mimua ya ing Guinu!”

    “Ika nung ala kang balak taglus samba,
    Aku, malaus ku at malakwan na ka,”
    Ngana nining Pablo kang Pedro’ng abe na,
    Nyang sabyan ning tauli ing magpalakwan ya.

    Malagua’t salita, melaus ya’ing metung
    At melakwan nemang king dayat dinulung,
    Kaybat nang leko ing baru na’t pantalun
    Nining mayagap a e mig-urung-sulung.

    Ini namang Pablo a keta melaus
    Banting makasimba king balen, tinagus,
    E ya mipaindatun at e mamin a lub
    Ing pamangadi na, manga-urut-urut!

    Kasi agyang atyu kilub ning pisamban
    Ala king misa ing kayang kaisipan,
    Nu’ne atyu karing asan a kelangyan
    At king kayabe nang kusang migpalakwan.

    Ini namang Pedro kabang manasan ya
    Ing milyaring iti…isip-isipan na,
    A nung baket rugu e ya mekasimba
    Pasari da mu ring asan a ikit da.

    “Guinu ku pu” ngana, “ikayu nang bala
    King kelan tetagan a depat kung kusa;
    Ikayu na sanang balang manupaya,
    Nung kasalanan man ing kakung agawa”.

    King milyaring iti a kusang depat da
    Di Pedro at Pablo ing bage antita,
    Para mo kekayu… nung atulan ta’la,
    INSANU KARELA ING MAS MIKASALA?

    LEAVE A REPLY

    Please enter your comment!
    Please enter your name here