Y Andres biaheru yang magtindang mialiwa,
Mangapalaut yang king dalan gagaga;
Ipautang na iti karing bisang kuma,
Ing singil kaibat ning pabulan menasa.
Miras ya Ilokos… at anggang Aparri
Disan na n’yan pati ing Mandawe city;
Dapot king agia mang mau yang babai,
King keyang asawa meging tapat ya iti.
Malagua’t salita, panuli na miras
Kasasabikan nang takman king mansanas;
Oneng tyempu namang bayu yang panganak
Ining asawa nang disan na king papag.
Natural mu keya ing maging matamle
Uling e sumilbi ing abe na bale;
Iting asawa na ‘niang apansinan ne
“Andres”, ngana niting minyabing malale
“Balu ku nung nanu ing kalulungkut mu,
Ot e ka pa lumual kabang makanyan ku?;
Sigi, e na ku man mimwa nung burian mu,
Manintun na ka pang ipalit mu kaku”.
Kaibat neng dininan pera ning babai,
Ing kalulung Andres tane’ tinureti;
At ing aisip nang munang puntan niti,
Ing sikat diling bar king Angeles city.
Dapot e pa binang malaut lekaran,
Apaindalanan neng mamalis y Toyang;
“Kumpare”, ngana ning minatu king dalan,
“dintang na ka pala…nu’ka munta kanian?”
“Ay kumare” ngana, “balu mu na mekad
Ining kumari mu bayu yang panganak;
Antining e ku pin makasiping agad,
Kareng paupahan ku pa magpalabas”.
Ngana ning kumari: “Ay kumpare, tuto?
Aba, e ka rugu makanyan mamiru!
Ot dumayu ka pa… samantalang ken mu
Atin na ka akuang tambing mu pang balu!”
E binang mekaba ing pamisabi ra,
Y Andres inagkat neng menik kumari na;
At karin king kuartu iniang lungub na la
E ku na balu pang sabyan ing gewa ra.
Malagua’t salita merapat ing sukat
Malyari kareting aduang mipanagkat;
E ku mu balu nung magkanu binayad
Y Andres kang Toyang king bage meganap.
Kaibat, tinipa neng dapal ing lalaki,
Kabang aplit nemang manyukle’y Kumari;
Medyu patagal pang sinenyas na niti
Ing ‘flying kiss’ ketang palako Kumpari.
Mapilan penandit miras ne karela,
Ing ganadung Andres a pakanta-pakanta;
“Aba” nganing misis… obat mibalik ka,
‘Tin kang akalinguan o kulang ka pera?”
“Ali, e ku na pin pekalaut-laut”
Ngana niting Andres a migkwentung lubus;
“Kasi, nanan ku pang king Angeles taglus,
Atin mu naman ken… tipid pa keng gastus”
“O kenu ka minta?” ngana ning babai;
“Aba, angga ku mu keta kang Kumari”;
“Nanu, memayad ka o binye nang libri?”
“Syempre naman darling upahan ke iti!”
“Magkanu mo Andres ing keka na singil?”
“Binye ko ngan detang inabut mu nandin!”
“Susmaryosep” nganang keng kamwa mamigil,
“Singilan na ka pa, misan ka tinagkil?”
“Aba naman Andres kelan dang konsensya?
Samantalang ila ketang ala ka pa,
Misan man e minye ing kayang asawa!
Kaibat misan mia mu linabas ing keka,
Singilan na ka pa? Ante’ing marine ra?”
