1.
Paggunita noon sa araw ng laya
kung ipagdiwang sa ating inang bansa
ang layunin nito at tunay na diwa
sa puso ng pinoy maalab pang lubha
2.
Naglalagablab at umaalipato
kahalintulad ng apoy sa impiyerno
di nililimot ng mga Pilipino
ang kahalagahan ng araw na ito
3.
Dahil sa natamo nating kasarinlan
sa kamay ng mga sakim na dayuhan
na umalipin at naging tampalasan
sa ating bayan at mga mamamayan
4.
higit tatlong daang taong pagdurusa
sinapit natin sa kastilang kolonya
nang ang kalayaan ay maideklara
mga mamamayan labis ang ligaya
5.
kaya mula noong lumaya na tayo
ay taunan na kung ipagdiwang ito
tuwing ikalabindalawa ng Hunyo
paggunita natin sa layang natamo
6.
Subalit sa ngayon itong pagdiriwang
sa araw ng laya’y tila palabas lang
upang ipabatid sa ‘sandaigdigan
na malaya na ang ating inang-bayan
7.
Ngunit ang totoo ay hindi pa lubos
layang sa atin ay pinagkaloob
sayang ang hangarin na napakarubdob
ng mga bayaning sa parang nalugmok
8.
dahil ang kadena na itinirintas
ng mga dayuhan noong nakalipas
magpahanggang ngayon di pa nakakalas
sa pagkabalunbon di pa rin lumuwag
9.
Nakakawing pa rin sa’ting mga paa
at sa leeg nitong maralitang masa
imbes na lumuwag ay hinigpitan pa
ng nasa gobyernong mapagsamantala
10.
Tayo nga kaya ay malaya ng tunay?
kung wala ng piring itong katarungan
kung mayrong alipin pa ng kahirapan
at ang demokrasya’y hindi maramdaman
11.
Habang sa gobyerno ay may namumugad
na mga taksil at mga mandurugas
ang kalayaan na ating hinahangad
ay sa panaginip na lang matutupad
12
Iwawagayway ang watawat ng husto
ngayong ikalabindalawa ng Hunyo
may makikita kang dito sasaludo
na mga buwayang nagkatawang-tao
