1.
Ustung makalbug na dakal a biyaya
miyaliwang asan hitu at tilapia
ding mamaril asan as no king katula
neng makabaril la ta la maligaga
pati ring mumumang kitig king taldawa
e la mababasyu dakal la akakwa
2.
Karing manungkulan atin mamye rasyun
pribadung kumpanya at organisasyun
karing balang baryu aplit lang luluyun
king ban dang gampanan ing karelang misyun
ding aliwang mamye ing imbut da’t layun
mamanagal la king tutuking eleksiyun
3.
Bukud king rasyun a karelang pamubud
karing miyapektuang tau neng makalbug
manyamantala la kabang ating albug
ban keta ring tau mayan dong akwa lub
bista’t man ing danum misna king kabuluk
ala lang panganlap king dano mamalug
4.
At ding tau naman neng masakit ing bie
tanggapan da rugu agiang ninung mamye
lakuas ding memaryung makalbug a bale
tuturing da iti a biyayang tune
agiang NFA pang abias pagtiyagan de
a babaung meum ustung unyaban me
5
Inia neng makalbug dakal a biyaya
relief goods ampo pang asang miyaliwa
magrasya’ing makalbug ngara ring aliwa
lakwas nung dakal ing karelangakakwa
dapot karing tau a sapak lipunga
grasya yang albug yan a maybug sumpa
6.
Nanan mu pin naman ing rasyun dang pamie
nung makalbug naman king kilub mung bale
at nung mistula yang dagat ing marangle
a menampalasan king tenam mung pale
at nung linapo la ding plasdan mu abe
mekad maybug naka rugung magimate
