Home Opinion Ding mialiwa clasing asu

Ding mialiwa clasing asu

588
0
SHARE

King kecatang bangsa, bina nong maracal
ding manyese asu, nucarin mang lugal
mialiwa no’ clasi ring lajing mamaglual,
caretang ‘imported’, ASPIN ampon ASKAL

Ating German shepherd, ridgeback, pumsky, boxer,
Chow-chow, husky, pit bull, at Boston terrier
Greyhound, Japanese chin, pomeranian, pointer,
Saint Bernard, jack russel, chihuahua, Rottweiler.

Maralas K9 la ring gagamitan da
caring operasyun ding NARCOM king droga,
antimurin detang larinu king bomba
caring ‘snipping dog’ la naman mamasa.

Ding asu ila ring mayap diling bante
Kilual man o kilub ding kecatang bale,
bucud pa canita, tapat lang macyabe
caretang lilingap, a caren manyese.

Caring asu ating misna king catunud,
lacuas ring misane king lambis ning agud.
Ating mapanagal, at mapanyagudsud
ampon taimic a sasagpang na cabud.

Dapot macatacut la ring alang ikî
uling matsura lang dili panugalí,
ren apin ding asung e bisang cawanî
at caring amu ra pane macatukí.

Ila ren ding sese da ring puliticu
a mas mabagsic pa caring tutung asu,
bucud king sica’ning carelang pamau
pane pa’ing caung da, baski alang tau.

Caring babanten da e ca man milapit
nung e ra ca capad, agad dang bubungit,
ngisngisan daca pa ba ra lang ipakit
ding pamatacut dang matilus a patsit.

Macanian man caring asung mesambitlâ
ati’namang mayap ampon maganacâ,
dapot mas daca’la retang macasorâ,
a binang masangil ampon mapangayâ,

Apakit da sanang malugud lang tune
karing lilngap a carela manyese,
baski pa buldit da karen padilat me
gawan da agia mang as ne king kabange.

Mimingat co caring macanian a asu
uling pota rugu akinis da cayu,
agpang caring doctor na ning San Lazaru
king tagle rang “RABIES”, ala pang panulu.

Vhelle V. Garcia
March 6, 2021
Abu Dhabi

LEAVE A REPLY

Please enter your comment!
Please enter your name here