Bayung Banua, bayung pagasa

    454
    0
    SHARE

    (KASUGLUNG NING MILABAS A ISYU)

    AT NUNG
    bakit ila rening paniakpan da
    Ampon susoso keng danum ing tinda ra,
    Kabang ding gagawa kareti, oreta
    Keng negosyo reti magpakasasa la;

    At e la bitasa mang matitigatig
    Keng bili ra uling dakal la “kadikit”
    Kareng keng gubyernu a magmamalinis
    (At masala mata, pero e makakit!)

    Kasi pin, nanu’t ing makanian a bage
    Iligal, obat mo manatiling mabie
    Nung ding otoridad a sukat magbante
    Ban mituknang iti imbut dang apate?

    Ngaku wari obat aliwa ing uyat
    Ning dikut ing munang asualan ban agad
    Mate nung iti ing talagang pigagap
    Ning gubyernu banting lubusan mapatpat?

    Mupin nung inya mu susulit nung misan
    Ing pamipa-iral king bage makanyan,
    Ya’ytang nung insanu na pin ing iligal
    Kareti la magka-ekstrang panakitan!

    Tanggapan ali ra deting keraklan ken
    A magkukunwaring malugud king balen,
    Matning asabi kung ing interes da ren
    Pansarili mu at e karing memalen

    A sukat lingapan o sagipan kaya
    Neng panaun a nu’ matinding sakuna
    Ing miras, antimo pin ing meminsala
    Ken king Leyte a nu’ dakal ya sinira

    Ing bagyung Yolanda a sobra kasikan
    Nung inya dakal ya mu naman sinintang
    Bie ampon pagkabie…(pero sumangid nyan
    E kaya dakal la namang menakitan?)

    Karing aliwa pang atyu keng gubyernu
    King pemye rang ‘relief’ keti kekatamu
    Ding mialiwang bansa a sinaup ustu
    Ban e la dumanup ding dakal a tau.

    Kasi pin nung misan malati mung bage
    Pag-intrisan da pang king bulsa ra ike
    Ding keraklan a nu’ ing kelan marine,
    Yang anti ra waring gagawan pagkabie!

    A’yala na mekad konsensya marahil,
    Nung inya anti rang e dirinan pansin;
    Deti ilang sukat tang’ ipanalangin
    A ing sana lubus no’ngang magbayu pin

    At sana nanu mang bage e masampat
    A denasan tamu king banuang milabas,
    E na maulit pa king aldo ning bukas
    At ing sablang bage magbayu na piblas

    Bistaman pin iting banuang dos mil tresi
    Atin pang pagmalun a bitbit na niti
    Busal ning salu na king mengapalyari
    Ketang panaun na ning banuang mesabi.

    Masaplalang bie ing lubus tamung aduan,
    Kapamilatan ning Pungul king Sabsaban
    A mengabus king mabilug a sikluban
    Keng panga-bait Na king yatung karinan.

    Itangad ta’la ring kekatamung mata
    Ampon ding pusu tang’ tikal nang manaya
    King mas maunlad at migit pa king sadya
    A Masaya’t Masaplalang Bayung Banua!

    LEAVE A REPLY

    Please enter your comment!
    Please enter your name here