ng di lamang libo kundi ‘in millions’ na,
itong lubhang atat makapangampanya
nang wala sa takdang panahon talaga
Partikular na ang mga pang-nasyunal
na posisyon itong ninanais nilang
masungkit, kung kaya lahat ng paraan
ay ginagawa niyan para manalo lang.
At dahil na rin sa ganitong estilo
ay higit ang tsansa’t posibleng panalo
ng mga may pera at kilalang tao;
(O angkan lalo ng mga pulitiko).
Gaya halimbawa riyan ni Mar Roxas,
na ‘sing-tanda na halos ng Filipinas
ang pangalang taglay – (palibhasa’y anak
ni Gerry at Apo yan ni Manuel Roxas).
Kumpara kay Binay higit na malaki
ang kanyang tsansa sa pagka-presidente;
Huwag lang sa anino ni PNoy tumabi,
tiyak ang panalo ni Mr. Palengke.
Kasi dala na rin ng ‘Tuwid na Daan’
na kanilang sa’tin pinangalandakang
tatahakin laban sa katiwalian,
baluktot din naman ang kinauwian;
At ang umiral ay dati ring tugtugin
na masahol pa sa marapat baguhin,
Kaya’t anhin man nating paka-isipin
ya’y wala rin namang buting mararating.
Lalo’t tulad nitong kung alin ang labag
sa Saligang Batas nitong Filipinas,
Partikular na riyan sa’ting tinatawag
na Omnibus Election Code na marapat
Sundin ng lahat na ay bale wala lang
at patuloy din namang nilalabag yan,
Ay ano pa nga bang ating maasahan
kundi ng korapsyon at grabeng nakawan?
Gaya nitong di pa man nga ‘campaign period’
ay napalaki na riyan ang nagastos,
Yan sa ganang akin may peligrong dulot
sa kabang-bayan at kay Juan dela Cruz.
Pagkat saan nila posibleng mabawi
ang ‘millions of pesos’ na pananalapi
na isinugal sa paghabol sakali,
sila ang posibleng sa laban magwagi?
Tulad halimbawa ng nagastos nila
bago pa sumapit ang pangangampanya,
Kung saan sa posters lang at karatula
at iba pang ‘election paraphernalia’;
At kung saan kahit walang nakasulat
ni anuman liban sa pagpapahayag,
Ng mga pagbati riyan ng ‘Merry Christmas’
at Manigong Bagong Taon sa’ting lahat;
Pero ang tunay na mensahe talaga
ng ganitong klaseng pakulo kumbaga,
Ay mapagtatantong pamumulitika
at hindi marubdob na pagpapahalaga.
Gaya nitong iba’t-ibang ‘infomercial’
na araw-araw ay mapapanood diyan
sa TV, at sa Radyo napapakinggan;
at nalalathala rin sa pahayagan.
Yan ay hindi pa ba napakaliwanag
na pangangampanya nating matatawag?
Kaso, tama’t tayo’y may Saligang Batas
ay ‘lawmakers’ itong kusang lumalabag!
