(Karugtong ng sinundang isyu)
Huwag naman sa ganyang klase ng pag-‘practice’
Ng ating propesyon Ginoong Enriquez,
Ibilad sa isang di kanais-nais
Na eksena itong inyong dinadawit
Sa kung anong kaso na walang batayan,
Liban sa posibleng dahil kaanak niyan
Ang may-ari nitong ‘junkshop’ na naturan,
Kaya si Wong itong gusto makasuhan?
Pagkat ano’t nagsumikap makakuha
Sa ‘Records Section’ ng RD sa Pampanga
Kung di ng dahil sa si Mayor talaga
Ang ninanais n’yong ipitin kumbaga?
Halata ang inyong pagiging makiling
Sa inyong kliyente kung pakasuriin
Ang ilang animo’y patuya’t pasaring
Na pananalitang sa bibig n’yo galing.
Pagkat base na rin sa naging pahayag
Ni Mayor nang siya’y aming makausap,
May mga ‘footages’ na di pinalabas
Si Mr. Enriquez, na kung saan dapat
Narinig ng lahat ang panig ni Mayor
Ng mga sandaling ang Imbestigador
Ay kapanayamin nila si Ginang Wong
Sa munisipyo ng bayan ng San Simon.
At saka bakit daw may mga ‘footages’
Na animo’y gabi nang ito ay i-’tape’
Gayong di naman niya na-‘meet’ si Enriquez
Nang gabing sa junkshop yan mag-‘investigate?’
At ‘daytime’ nga nang siya’y kausapin nito,
Kaya di malayong sa naturang punto
Ay itong sikat na ‘broadcaster’ sa radyo
At television ang di patas sa isyu.
Sa paglalahad ng mga bagay-bagay
Na tila malayo sa katotohanan,
Pagkat si mayor nga ang pinalilitaw
Nilang may-ari ng nasabing iskrapan.
At siya itong hangga’t maari’y ipitin
Nina Enriquez at ng kanyang kliyenteng
Takot lumantad at magawang harapin
Ang kinakasuhan kaya nasa dilim.
At di gaya nitong puro akusasyon
Na katulad ng usap-usapan ngayon
Ang ibinabato nila kay mayor Wong,
Na may kani-kanyang ‘premature’ na hatol.
At pinalalabas nilang si Mayor nga
Ang dapat kasuhan hangga’t magagawa
Nilang ipitin sa paraang di tama
Di baleng ang taong ito’y mapasama?
Alam n’yo bang sa pamilya ni mayor Wong
Ay di lamang nitong siya’y naging mayor
Sila nagka-‘junkshop’ kundi maging noong
Maliliit pa sila diyan sa San Simon?
At ang tatay nila na napakasipag
Isa sa negosyo nito ang mag-‘junkshop,’
Kung kaya ang kaalaman nila’y sapat
Upang sa anumang iligal umiwas.
Ipagpalagay nang ang kanyang kapatid
Ay nakabili ng bagay na inumit,
Siya dapat ang kasuhan sa ‘Court of Justice’
At di ang Alkaldeng di kanya ang bisnes.
At sa ganang aming pagkaka-intindi,
Si Mike at kanyang mahal na kliyente
Ay masasabi kong ‘barking up the wrong tree’
Ang bintang nila sa butihing Alkalde!
