Keti Pilipinas bina la caracal
ding manyese asu, nu’man caring lugal
mialiwa la clasi ring ngeni mamaglual,
a ngara ‘imported’, ASPIN ampon ASKAL
Ating German Shepherd, Ridgeback, Pumsky, Boxer,
Chow-chow, Husky, Pit Bull, at Boston Terrier;
Greyhound, Japanese Chin, Pomeranian, Pointer,
Saint Bernard, Jack Russell, Chihuahua, Rottweiler.
Maralas K9 la ring gagamitan da
caring operasyun ding NARCOM keng droga,
antimurin detang larinu king bomba,
caring ‘snipping dog’ la naman mamasa.
Ding asu ila ring mayap diling bante
Kilual man o kilub ding kecatang bale,
bucud pa canita, tapat lang macyabe
caretang lilingap, a caren manyese.
Caring asu ating misna king catunud,
lacuas ring misane king lambis ning agud.
Ating mapanagal, at mapanyagudsud
ampon taimic a sasagpang na cabud.
Dapot macatacut la ring alang ikî
uling matsura lang dili panugalí,
ila ring asu a e bisang cawanî
at caring amu ra pane macatukí.
Ila ren ding sese da ring puliticu
a mas mabagsic pa caring tutung asu,
bucud king sica’ning carelang pamau
pane pa’ing caung da, baski alang tau.
Caring babanten da e ca man milapit
nung e ra ca capad, agad dang bubungit,
ngisngisan daca pa ba ra lang ipakit
ding pamatacut dang matilus a patsit.
Macanian man caren a kakung mesambitlâ
ati’namang mayap ampon maganacâ,
dapot mas daca’la retang macasorâ,
a binang masangil ampon mapangayâ,
Apakit da sanang malugud lang tune
karing lilngap a carela manyese,
baski pa buldit da karen padilat me
gawan da agia mang as ne king kabange.
Mingat cayu caring macanian a asu
uling pota rugu akinis da cayu,
agpang caring doctor na ning San Lazaru
king tagle rang “RABIES”, ala pang panulu.
Vhelle V. Garcia
Abu Dhabi
United Arab Emirates
