1.
Ang mga BHW at ang mga bantay bayan
mahalaga ang papel na kanilang ginagampanan
mga Barangay Health Workers lagi ang inaasahan
pagdating sa usapin ng aspetong pangkalusugan
ang mga barangay tanod naman ang
namamagitan
kapag mayrong nangyayaring sigalot at kaguluhan
2.
Ang buhay ng mga tanod ay laging nasa panganib
lalo sa maselang lugar na pugad ng mga adik
ang mga lango sa droga iba ang takbo ng isip
kapag hindi napagbigyan sa kanilang ninanais
nagpupuyos ang damdamin kapag sila’y naba-badtrip
matatapang at marahas kaya’t lubhang mapanganib
3.
Ang mga health workers naman ang malimit na isabak
sa Health Center ng barangay kaantabay ng mga nurse
gumagampan sa trabahong iniatang sa balikat
upang isakatuparan ang serbisyong nararapat
sa panahon ng pandemya sila’y hindi nagpatinag
bilang mga frontliners na naglilingkod ng tapat
4.
Subalit kung susuriin di sapat ang sinasahod
bilang mga kabayaran sa tapat na paglilingkod
ang mga BHW at mga barangay tanod
sa ibang nanunungkulan sa barangay ay mas pagod
ang iba diyan ay wag sanang ikasasama ng loob
wala namang ginagawa kundi maghintay ng sahod
5.
Masakit man na tanggapin subalit yan ang totoo
na hindi rin naman lingid sa kaalaman ng tao
ang iba dyan sa sesyon ay hindi naman dumadalo
lalo ang mga kagawad na abala sa negosyo
at ang iba sa kanila inuuna ang trabaho
kaya’t hindi magampanan ang serbisyong pampubliko
6.
Bagaman ang allowance na kada buwan ay binibigay
sa mga BHW at sa tanod ng barangay
ay sa IRA nanggagaling ngunit hindi makatwiran
sa uri ng trabaho na kanilang ginagampanan
sahod ng BHW at ng mga bantay bayan
siguro ay panahon na upang ito’y madagdagan
7.
Tutal naman malaki ang pakinabang sa kanila
ng alinmang barangay na pinaglilingkuan nila
ang kanilang sakripisyo’y di ba nila nakikita?
o talagang bulag lamang ang kanilang mga mata?
sabi nga ng karamihan kung ating ikukumpara
sa ibang mga kagawad mas masigasig pa sila
