NUNG dakal ka katoto’t kakaluguran
Ing bie pulitiku e mu paninasan,
Uling kabud iti ya ing memilatan
Miras king e dapat niting kamaulian
Pablasang nu’man pin katibe ing buklud
Ning pamiyabe yu, e binang malaut
Masira mu iti at ganap mapatlud
Potang iti yanang mangibabo lubus
At keta personal nang interes niti
Itang sumira pin king bage mesabi,
At muli mung alang kwenta bandang tauli
Itang masanting a pamyabe yu reti.
Antimo ring sadiang mitiket kanita
A meging mayor at bise alkalde na,
Ining tauli uling binang marapal ya
Kalukluk na pamu aliwa ne tira
At keta parati na neng pakisiran
Ing mayor a keya memitbit king laban,
A nung nu’ e mupin uli ning taung yan
Ing panyambut mekad malaut nang dasan.
A nu’ pati na ring konsehal kanita
Ning meging mayor a sadyang kakampi ra,
Meyakit ing deti a siportaan na,
Antimong konsehal, deng meging Mayor la.
Ating metung karen a sadyang konsehal
Ning alkaldeng iti ketang milabasan,
Oyan linto anti ne pa waring mortal
A ‘enemy’ ining e na dapat tagal.
At bali alana ita ning masanting
A pamiyabe reti pauli namu pin
Ning katutuan a ing personal na niting
Interes yang agad migbabo tambing!
E ku buring sabian ing kelan balikid
Utang a lub niti king keya sinagip
At inabe ne n’yan karing konsehales
Ning kanita reti partidung ginamit.
Kasi balamu yang ala nang ulaga
Para karen ing tune kasagraduan na
Ning intensyon deting magsilbi talaga
Ngening ila mismu mipapanyira la.
At kelinguan da na itang mangasanting
A parasan deti kening malilyaring,
Ing sadyang katoto ren e ra ne pansin,
Bukud king kaylian da n’ya ngeni i ‘Manding’!
O keng pulitika talagang makanian,
Ala tamung priming kasangga’t kalaban?
Ding ngeni kakampi, ating aldo datang
Ila pa mekad ding mortal ta’ng kalaban.
Pablasang migit king nanu pa man ata
Ing mesabing bage kumpara king sabla,
Peka-marinat ya keti king masala
At ing mangibabo ‘ego’ ring aliwa.
Pablasang ngara ping magsalitang tapat,
ding masibukan keng pulitika – dapat
atin kang tetagan at pusung busilak
arapan ing bage marok ampon mayap!
