1.
Yniang iquit dacang quiquiac linapit cúng mitmung ingat,
qng siping mú linele cúng megumasid mùng malambat;
mánenaiáng ing canuan mú iiarap me at iiangat,
ban sâng ing sangcan ding luâ mú canacu mú ipagtapat.
2.
Mabilis ing agus ding luang caring matá mú papatac,
babalitá râ ing caplas qng sasyo múng salûng lapac;
inisip cú ing mitsa’ná ning aclis mú ing cabislac
nung inia sâ qng lupa mú ala náng aslag máng ditac.
3.
Mainâ iang agud qng gulut múng tatatap ing a’ibie cú,
bà mú mù sanang abalung atiu cumù qng siping mú;
mánenaiáng ibuclat me ban cú mú sâng maquisulú
qng aclis ná ning pusû múng manangis at manigapú.
4.
Qng sangca’na ning quiiác mu e cû dit’man migcamalî,
licua’naca ning sinta múng merimla nà at migmalî;
yng matapat múng pacamal a icuá náng pisauilî,
caring aliuang candungan menintun iáng baiung palî.
5.
Qng canacu mú pigtapat caibat múng mecapigunam,
tandus ia uaring mataram ing tinusuc qng calamnan;
yng sugat a cacú licuan ning napun cúng alang tipan,
peráiá’ne ning tacsil mung mapanucsung salucuian.
6.
Iquit cúng meian cá pusan qng quecá cú asaglaue,
pauli ning abalu múng daralan cú namang lumbe;
acung quecang câlûguran a balamu nu-an a bie,
atin cu namang daralang mapait a tagulele.
7.
Quenu iá pin maglaiunan ing manintun capasnauan,
nun’e queiang calupá náng metung mu namang salunan;
nung inia qng aldong itâ mipangarga ta’nâng pusan,
alang oras ing e câtâ miiaiabeng maniambitan.
8.
Qng pamandalan ding aldo ing calungcutan milaco,
uling qng metung at metung carin catâ magparaio;
qng e cú amamalaian cabang ing quirut mamaco,
ating lugud a sisirut, qng salu cú tando-tando.
9.
Ngeni, nanu ing gauan cú quening tutubung pacamal?
Macananú cung sambitlan ica’ing baiung pacamalan?
Agiú cú pá caiang dálán nung miulitan pang misan,
yng mipaimburisan iá ing caduâ cúng capalsintan?
10.
Tutung dacal nacú disan, ditac ná ing lalacben cú,
samantalang macabà pà, malaut pâ ing aian mú;
nung miiagnan cátâ sanang mibait queti qng iatú,
e cú mag-aduang isip man ing lugud páng pasibaiú.
11.
Inia ua man sinabi múng aluguran mucú naman,
e cú malyaring agauâ ing bandian daca’t angquinan,
uling e que agiung siran ing maluat táng piiabaian,
yng bucas mu, qng catutuan, iiang canacung isipan.
12.
Pauli ding siglaue cú at tapat cúng pemalino,
macanian mú nàng aisip ing lumaut namu’t maco;
qng malaut a balaian, pinili mú ing sulapo,
ban e tá ná magdusá pá qng calma táng alang lino.
13.
NGENI, o’ini ining pusung lubus náng mecacalinguan,
qng quirut ná ning milabas a maluat cúng pigmalunan;
yng cacu ngening gagauan, e nâ para mangalinguan,
uling caring alala mu, carin cu cucuang sicanan…
PL Cris A. Gonzales



