pilan ka mung dangkal, king dutung midatuk
nung ating melili, saglit mung mangurus,
n’yang mangisnawa pa, bandi ing palibut,
ating matutula’t sasaksak king gulut.
makanian ya ulaga, masaklo ka mata,
buri mung saklawan, pati na ‘li keka,
uli bang makwalta, miki impluensya,
alang kamag-anak, basta’t akwa mu ing nasa.
bage king umpisa, makanian ing tau,
mangamkam yang gabun, abeng teritoryu,
ala yang pikabsian, ni e mikontentu,
angga king daya na, e langi king yatu.
mayayama ka ba, lualas mung asyenda,
marakal tanaman, bakud a makaba,
ni kasiping bale, laut milya milya,
ing pami-ugnayan, ala na, ala na.
ing pakakalulu, nung iya mate man,
bale ng maluka, deng tau siksikan,
marakal darame, lalam ning balayan,
nung ikang mawala, mapilan deng datang.
e mu apapansin, dakal ka ping gabun,
kaladuang inangkin, salang mibubuntun,
impierno manaya, keni ya magdatun,
likwan mung pibandian, magkamal deng kampun.
tutung malaliari, deng misiping bale,
pipag-badbaran da, kapurit a dake,
e la mikasundu, ‘gang megi lang bangke,
pamikamag-anak, misudlung ali ne.
pamagsarili mu, mayamang papasyal,
biglang dimdam sakit, taram na ning punyal,
ing daya tutulu, mamagus, gagapang,
mepatad inawa, keng gabun mibulang.
bayu mipyak mata, auma ing digpan,
ngeni ‘yang kakaul, e wari sasamban,
ditak mung kadangkal, sukad mung katawan
deng kekang siklawan, e agyung kumunan.
bakit ating sukib, mate ya ing tao,
king pali ning api, kasakmal kang abo,
balbaling lunanan, keni ipuwesto,
deng aliwang lekwan, keng dagat pegato.
ing pakatandanan, mipwak kang ‘lang balu,
miski nung mabating, ika mu, ika mu,
dapat ating silbi, kekang panga-tau,
o neng mipasoso, keti babo yatu.
