1.
Nanu yá at no yá susut ing upayâ
a tinaptinapan ding magnasang binâ;
datang nia mù kayà at miibye kusâ,
kenu man o atin yáng dalan a takda?
2.
Ing lilung upayâ atlu yà pupuntan:
Muná, keyang alal king kapanibalan;
a pilinan dà ring mibuklud-bukluran
bate king nung pilan la king kabilangan..
3.
Nanu pá tá iting mányale upayâ
limitadú yamù karing milagumâ;
ala yáng sıkanan karetang e bisâ,
a e meki-abe king sakup ná’t nasâ.
4.
Ding aliwa, pijung atin láng sarilí,
mengipuk lá namang pamuntuk karetí,
a pigkaluban dáng upayang magsilbí
ban pamingwa nala ding legal dáng bandí.
5.
Kadwa: ing upaya sumut yáng mánginú
keyang telagà ning alal a maginú
ban akasaup ná karing sablang isyú
king sasakupa’náng lugal at o taú.
6.
Katlu: atiu karing lider ding monarkyá,
karelang magmaná palipat-lipat yá,
uling ding daya rá sultan lá at rajá
o kaya prinsipi ampo páng princesá.
7.
Ngana ning maginung balamu misugû
yá kanung mepili king banal a tuldû
inya kanu dapat keyá lámù dukû
uling nung e káyá miparusan lamû.
8.
Ing ausan dang kapat, ya iting ‘bat babo,
mapangalalu yá, matas yá talindo;
ing buri na yamû kabud ing makalto,
palsipikadu lá, ding aliwang lalto.
9.
Ing kutang ninu yá ban umisa’nalá
ding bisang sumuyû lwal king bekura’ná
upaya ná kaya ing pilita’nalá
ding keya e bisa king banal náng nasá?.
10.
Itang tutung Diyos, Dios Yáng e mamilî,
uling king katutuan, ala Yáng tatangî;
inya ing upayang keya rá lilimpî
ilusyun da mù ring mamag-anyung budnî.
11.
Metung páng katutuan dikil king Dios a nuan,
iti e makialam king bie ning ninu man;
timawa ya’ing tau king buri nang gawan
ya naman ing marap king kapamupulan…
12.
Nung inya ninu máng sasabing tildu Ne
ning Dios a painawa ketang Keyang lele
tau yáng miwale king ukul náng tune
a pagalawan ning matilo nang ere.
PL Cris Gonzales
