melalang ya ing tau,
nanu mang mangisnawa,
susulapo, kakawe,
gagapang mabagal pa,
nokarin man migtadatun,
ing meging bie payapa,
ban alang mipapate,
kabyayan kanya kanya.
uling ing salpantaya,
marurunut anting yelu,
king atyan na ning Maria,
meulmang Hesukristu,
pisyag ing salita,
tibus ing sala tamu,
maski king libutad na,
Hudas kaya migpapaku.
ibat ng Kristung banal,
mibayu ing karinan, lulsut la deng
Emperyo, telakad kaharian,
at ninu man karela,
nasang asakup na ngan,
makanian ya ing tau,
daya nang
mapagkamkam.
kalingwan na ing napun,
tyu ta king bayung siglu,
migbayu sabla sabla,
espada e na usu,
king metung timid bilug,
mapilan mung segundu,
kumpas na ning diktador,
balyan ‘la ni aninu.
matutula la pa kaya,
pilan lang mitatagan,
datang murin ing oras,
karit ning kamatayan,
nung ing teknolohiya,
karelang serilinan,
baka miras ing aldo,
ilang milaban laban.
lawen nung iyang dili,
king sarili ng bansa,
alagas deng kalaban,
kalupa mu king nasa,
e kaya sinagi man,
atin pa bang konsensya?
bira egana gana,
kabiasnan mengawala.
at pati kasaysayan,
king tuking henerasyon,
mibalik pasibayu,
panaun ng Solomon,
bumilang kang milenyu,
bayung lahi deng mumusbong,
atin pa kayang Henyo,
n’ya melulung kareng cellphone.
kakung imahinasyun,
ditak pa king sikluban,
tajimik ing paligid,
alang pigunam gunam,
kasapwak na ning abak,
aslagan mala kristal,
dalakit ing kabengian,
lubus ing kapayapan.
e balu ‘gang kapilan,
mibalik ta king sadia,
king makabang lamesa,
buu ya ing pamilya,
mangadi bayu mangan,
magmanu kareng matua,
pati king pamanalbe,
sabe sabeng matutula.
nung tange ta king agus,
ala nang akarapat,
atin pa kayang datang,
a mas lalung marawak,
pag iti ing maliari,
e ta taung penganak,
‘tin ka ping laman daya,
pandama e na sapat.
tang napun o ining ngeni,
nung pamilinan da ka,
ing napun ya ing buri,
king kalupa kung matua,
kareting kayanakan,
ngeni ing pilinan da,
e balu ing milabas,
deng magkwentu ala na.
