ING KULTURANG pamagtawu neng magpyesta,
Kabilang na karing agisingan ta’na
At e sasalanan a pamagselebra,
Ding ninunu tamu ibat na kanita;
Nayun man o ali king Santa Iglesia,
Nung buri ding dakal makibage na ka;
E na man siguru makabayat keka,
Ing magtawu ka man misan king pabanua!
Tabalu mu pin nung bakit mi-usu iti
A ngara, Kastila lang migdala keti,
King tradsyun a yan a magastus pati
Bukud king abalang maragul parati;
Natural mu agiang manutang ka ngeni,
E mu papaliarian keng pyesta paytauli;
Burian mu mo waring ikang bukud dili
Ing e magtawu at lunto mainang klasi?
Pero nung isipan – at maging praktikal
Ya ing balang metung king bage makanian,
Iting pamagtawu a meging piugalian,
King pakakalulu pasakit mung dakal;
Makanano agiang misan ya manutang,
Uling makyanti ya pilit yang kimut yan;
At keta kaibat ning tawu na megisan,
Atin pang mamintas karing mekipangan.
Ating sasabi ken, “masias ing asadu,
Ing minudu” ngara, “lasang istupadu,
Malat itang tidtad, maslam ing adobu”
At ing gule naman kulang a rikadu;
Ding mapad keng inum e la mikumpletu,
Nung e ka papaynum ‘beer’ o maski nanu;
Ing masulit mu pin paynum na kang ustu
Pagsisti ra ka pa ding aliwang tau.
( Nung supisyenti ka’t katalaksan a ‘beer’
Mitipun lang pihu keka ring kalasing,
Uling malaut lang keng inum mabitin
Agiang patingapun lang aplit totoning;
King anti kaniti ing mabayat mu pin
Magkang alang kusang mako o mabating;
Kase, angga na king e mo apalasing,
E ra ka lakuan den angga na king silim.
E ku balung sabian nung bakit ing inum
Meging piugalian nu’man sang’ okasyun;
Kasalan, binyagan o nanu mang pusyun,
Balamu e ganap nung e ka papaynum;
Ing ‘birthday’ lalu na, ken pelalung mirun
At e kumbiradu makitagun-tagun;
Partikular na ken ding patitingapun
Alang panayan ken nu’ne magpapaynum!)
Keng pyestahan, metung pang e ustung dapat
Ding aliwa ya’ytang sasabit lang agad;
Nung ing kayabe mu balu me kalidad,
E ka bisu-bisung keng pyesta me yagkat;
Lalu’t ding pintan yu e mo kamaganak,
Makarine bina nung gawa yang palpak;
Ing milalu siba king insa’mang apag,
Pangingilagan la keng kasikan laklak.
Inia nung aku pu ing kekong kukutnan,
Ing dikil keng pyesta buri ku nang lakuan;
Kase anti keni: nung kabanalan man
King tune diwa na, ta’ne mitalandang;
Nung tutu ing ngara king iti parangal,
Karing santo’t santa tamung patulunan,
Obat maliliaring angga mung pamangan
Ampon inuman ing pane kapupuntan?
Dakal ta’na pintan a mialiwang pyesta,
At maging itamu memamyesta ta’na;
Pero kapilan na miliari talaga,
Kilub ning bisitas linub tang’ sinimba?
Inia nung ngara mo’ pamagmasusi ya,
King aldo beitan ding Santo at Santa,
Iti malaut na king tutung aske na
Ning banal a misyon ning Santa Iglesia!