Ang pulitika sa bayan ng San Simon
ay tila nagiging LABANAN NG KAMPEON
ng magkakasama sa administrasyon
at mga kalaban nilang oposisyon
nagpapaligsahan sila sa pagtulong
kahit matagal pa bago mag-eleksiyon
Napakabuti ng kanilang hangarin
ika nga’y wala kang itulak kabigin
kanya-kanyang gimik upang magpapansin
sa mga botante na nais himukin
upang sa halalan sila’y tangkilikin
ng ilang tao na madaling bolahin
Walang masama sa pagpapaligsahan
sapagkat marami ang natutulungan
lalo na ang pobre nating kababayan
na siinalanta nga ng bagyong nagdaan
hindi lang kakaunti ang nabiyayaan
sa mga ayudang ipinamimigay
Subalit ang bagay na hindi maganda
sila’y namimili ng bibigyan nila
kapag ang botante ay hindi kanila
malabong mabigyan ito ng ayuda
ang dapat tulungan na mga biktima
apektado na ng sobrang pulitika
Ibig lang sabihin ay magkapareho
ugali nilang may pagka-benggatibo
nasaan ngayon ang SERBISYONG TOTOO?
at ang BORN TO SERVE na ayaw magpatalo
sa pagbibigay ng serbisyo publiko
naka facebook pa at naka-LIVE VIDEO
Ang ganyang diskarte’y masyado ng gasgas
kumbaga sa pain wala ng kakagat
dahil hindi lingid at batid ng lahat
ang kanilang kaso na kinakaharap
kapag nagkataon lalos silang lahat
na bibigo lang sa kanilang pangarap
Kung kaya’t marami ang tumutuligsa
sa pakitang tao nilang mga gawa
ang mga tunay na mapagkawang-gawa
ay kumikilos ng di nagsasalita
di tulad ng ibang ngawa lang ng ngawa
at puro pa-pogi sa harap ng madla
Bakit di tularan si ex-mayora WONG
iba ang sistema ng kanyang pagtulong
bukod sa disente hindi mapagpatol
sa paninirang sa kanya pinupukol
hindi nakasuhan ng GRAFT AND CORRUPTION
nang siya pa ang meyor ng bayang SAN SIMON
Hindi na kailangan pang magpasiklaban
upang tulungan ang mga mamamayan
ang mga iringang walang katapusan
ay balakid tungo sa kapayapaan
ang pagkakaisa ay lubhang kailangan
sa ikauunlad nitong ating bayan
