Home Opinion Sinlag yang migit king  sadya ing Pampanga

Sinlag yang migit king 
sadya ing Pampanga

166
0
SHARE

DANE kayli ning probinsya nung makarap ka Pang-ulu,
A nung nu’ya makatalpak ing bunduk ning Pinatubu;
Keni, nung nu’ manuknangan itang engkantadung Apu,
Besibas neng Sinukwan king keyang gilingan a gintu;
Inya naman ing besibas antia’ng aping mikaluku,
At nyang mablas ya mirame pati na ring mangarayu.

Pati e na sukat dasan nitang mibabayang balas,
Miyagusan king kasbu na ning salu nang biglang mitdas;
Pelalung atyu king bunduk migkapilit memanguldas
Uling alang memalen ken a e mo sana melisuas;
At king sobrang sengilan na, e la ditak ding meyapas,
Bukud pa king den ala lang nanu mang bage aligtas.

Ing balayan ning Bacolor a sadya nang kabisera
Ning mal tamung lalawigan yang pisakit timbunan na;
At nung waman ding aliwa e no’ lubus pekabara,
Dapot king bengisan niting bunduk a’yti diname na;
Uling pelalung maragul a ilug ken pemate na
At leko na la paranum ding manasik king gabun da.

Ninu mo’ ping e tumangis at ngulangul king pagsalbat
Ngening deting santungan da mitambunan la’t melasak?
At nu’ anti katibe ing salu ra ban e malasak
Kabang daramdaman deti ing gulasyo at gulisak
Ding makatwa at babaing maybug maluse keng sindak
Potang akit dang mamagus itang bubusuk a burak?

Pilan lang pakakalulung memalen a mibwis a bie
A e na meyakit mu man o milibing kaya bangke?
At nu’lanti karakal ding mengatambunan a bale
King atmu kapaling lahar a kinusad king marangle?
Deti at ding aliwa pang mangasanting a pagkabie,
Sindak king penandit a ita ing king pusu ra memale!

At uling mistulang meging disyertu ya ing Bacolor
At anti nya waring gamit a biglang milako valor,
Dakal lang metabang a lub karing daywan a investor
Ampon e na mabilang pang ibat king aliwang sektor,
Ban mamuklat negosyo ra ngening mapusyo ne kolor
Ing Athenas ning Pampanga king paleta da ring pintor.

Dapot uli ning likas a tetagan ding Capampangan
At matibe parasan dang makapibangun pang miuman,
Kambe ding mangasipag a lokal tamung manungkulan
Linapit da king gubyernu nasyunal ing problemang yan;
Inya mapilan mung banwa ing mabilis a miralan
Maragul nang pamagbayu itang lubus ta’ng akamtan.

Ing mega dike megawa ya ban maging kabat king albug
At tulandung mabilis ing danum karing bebe ilug,
Ken nung waman ating sitsit a ngara king ating labug
Ing panga-kontrata niti karing mekitalbug-talbug,
Pikapkapan da na mekad ding keti mikuyug-kuyug
Banting akwa nang mayari ning panlaban ta’ neng lalbug!

Iti, mekasaup neman e mu karing pilan balen,
Nune pati na karetang kadane ta’ng malapit ken;
At ‘yan e ya mupin sana antimo ping mipaburen
Malaut neng mabitas at pasibayung larinan den;
Inya nanu’t iting dike e ta’ya pisopan banten
King kelan dang malasakit ding aliwa ta’ng kabalen?

Ditak, ditak ing Pampanga ikwa nang mekapibangun
King makabang kasakitan a kimtan na ketang napun;
At waman nyang ipakal ning bulkan itang susun-susun
A matinding kalamidad minye sindak at pagmalun,
Kaybat nita, anti waring sinlag gulut na ning dulum
Ing tindag ning Capampangan king keyang bayung panaun.

Nanu pata, king panyulung a malino mayayakit,
Ing Pampanga, nung e ya man karing aliwa mas migit,
Dapot e mitawli ngeni karing keya makalapit,
Nung inggil mu king panyulung itang bage ikakapit;
Uling itang Capampangan karas ketang mangasakit,
Lalu ta’ng tatatag a lub at titibe malasakit.

Subuk ta’na keng tepangan kesa king insa’ mang lipi
At yan e ra atawaran maging ding aliwang dai;
Inya nanu’t e ta’ agyu ing mibangun kararagli
King nanu mang kalamidad a kamtan na niting lahi?
Ing lupit ning Pinatubu, nung wari sa’ pin keng api,
King mal tamung lalawigan malambat neng mete sindi!

At ngening nung wari karing  mirasn bagyu king dagat,
Ikwa ta’neng alele king pampang ing bangka ta’ng mityab;
Iti, migit pa king sadya akwa ta’yang apatatag
Nung ing balang metung karing kabalen mabysang gunyat;
Pablasang ing panlaban king nanu pa mang  kalamidad,
Atyu mu king masanting  a pamidadamayan tapat.

Waman meging masangil ya iting bulkan kekatamu,
A kitkut nang kalas posti ding keraklan karing baryu;
Dapot, oyan mayayakit,  uling maka-Dios ta’ng tau
Iting mal tamung probinsya sinlag ya pang pasibayu;
Nung inyasa’t uli niti, adwan ta’ king Apung Guinu,
Ing grasya at patnube Na – sana Manatiling Atyu!!!

LEAVE A REPLY

Please enter your comment!
Please enter your name here