NANU YA ing resolusyun? Metung yang pisanmetungan
a disisyun king pamalak ding kekatang manungkulan;
Iti ing maging sulusyun king nanu mang pisasabian
para king ikasaplala ning mayap a kapagnasan
Ing nanu mang resolusyun, bayu ya pa man mapirma,
panigaralan de pamu ring miembru ing kalamnan na
nung ustu ing pakasulat, agpang king pikayari ra
kanita de pamu pirman ding balang metung karela.
At ding migirma kaniti, e ra na dapat ilingad
ing ala lang balu karing mali a e ra asyasat,
pablasang ding manwala mu king sangkan dang ipatuyag,
ding menabu mu king duyan, a mengadisporma utak.
Mamirma ka wari pin keng e mu balu pa kalamnan
o kaya king blangkung papil alang sulat a nanu man?
Yan mang babal a malutu, taung lipang kaisipan,
e ya kararagling mirma king e na lubus antindian.
Deta pamo kaya rugung tatangalan tamung tau
a mangatas pegaralan at menasa tituladu
ring sumabing e ra balu, at ala lang malit kanu
ngening ating mali karing pinirman dang dokumentu?
Nung ing pamagdiletra mu ketang metung a katayâ
ing e ustu, ing parapu, e tibubus a masira;
dapot kabud mabilug yang taladtad ing menaliwâ,
magbayu ne kabaldugan, amanung mipapawagâ.
Nung sakali mali neman, pangasulat ing nomiru
king nanu mang resolusyun a mepirma king konsehu,
metung ya mu kabaldugan, at dinalan a pursientu,
ing masalang katutuan a ating mabye dokumentu.
Agpang king kanakung dimdam, ala kanung resolusyun
dikil king ‘land conversion’ o likas ning titulung gabun.
Ita kanung pinirman dang apikayari king pulung,
ing balak dang pamanutang migit atlung dalang milyun.
Atin mu naman sinabi, arapan mismu ning Media,
at maginu nang inamin a kaya ya pin ing pirma.
Ing katuliran na niti a ginamit nang depensa
binie ne ning Sekretaryu, pirmadu re ring mayorya.
Tunggal- tunggal manos gamat, pauli na ning milyari
balang metung papalto nang ala yang balu kaniti.
Natural mung ing mituran, ampon mibuntunan sisi
ing pun a talapatupad – at ya kabud ing Alkaldi.
Sinabi ning metung karing konsehal a kayabe ra,
nung bisa lang dumiskarti, e ra ne sa darame pa
ing mabilug a konsehu king nanu pang mang dilensya
ding abe rang mangatako, milalu kakapal lupa.
Ing kutang a manenayang asna kalino pakibat,
karing perang limang milyun kaninu la kaya miras?
Sana kabud metukal la nung ninu ngang maki-rapat,
den mapaldak la’t mikaswan: ‘A BETRAYAL OF PUBLIC TRUST’!
VHELLE V. GARCIA
January 23, 2021
ABU DHABI, U.A.E.
