Pamagaral Kapampangan, makailangan gawan

    552
    0
    SHARE
    Antining buri tang’ ibalik ing sadiang
    Maningning nang aldo ning Amanung Sisuan,
    Alang munang diling dapat tamung gawan
    Nune ing magaral tamung Kapampangan.;

    At e ta’ kabud na manalig king nanu
    Itang darandaman king aliwang tau,
    Uling mapaliaring ing abalu tamu
    Sabing e makatud, salitang e ustu.

    Salukuyan ating programa keng T.V.
    A nu’ ing salitang gagamitan deti,
    Kapampangan ngarang kekata sasabi
    Pero ing keraklan pu makapakaili.

    Makanano, dakal itang e makatud
    Karing amanu rang king ere bubugnus,
    Kalupa namo ning “pinutut de buntuk”,
    Yan king akmang Sabi asne king kalaut!

    Keng Tagalug, ing yaus da “pinugutan”
    At keng Kapampangan “metabtab ya batal”,
    Inia nanu’t nung tune kang Kapampangan
    E ka masora keng antimo pin kanian?

    Ing “ulaga” at “alaga” e parehu
    Ing kabaldugan na nung ike king ustu;
    Karela’ing “ulaga” katulid na presyu,
    Kabang ing buri nang sabian niti”value”.

    Waman nung bigla tang’ isipan ustu ya,
    Dapot masanting na ing tamak talaga;
    (The words ”ampo” and “at”, den e la mu basta  
    Conjunction of words keng ustung gamit da).

    Nganang memalita ning metung kareti,
    Nung nu’ imbes “bayung bait pamung baby”
    Sinabi na: “bayung panganak a baby”;
    Inia ‘nakalaut king direktang sabi.

    Kasi pin ing “bayung panganak” ing Inda
    At ing “bayung bait”, king akmang salita,
    Ya kabud ing anak o ing baby kaya;
    Inia e makatud ing kayang belita.

    At dakal a dakal pang Sabing e ustu
    Ing karen keraklan mekad apansin yu;
    Inia anti na ning palabungan tamu,
    Samasan tana pu ing pamangamanu.

    O pamagsalita, ban e ta’ mapintas
    Karing makarandam king kekatang igkas,
    Ban keta ing Sabing ume nang mapanat
    Sagiwa yang miuman anti ing milabas.

    E ta’ mikakunung lumapit, mangutang
    Karing makibalu king Salitang menan,
    Ban keta mitud king ustu ing nanu mang
    Amanu o Sabing buri tang’ gamitan.

    Nanung ulaga ning pamangamit tamu
    Nung iti e naman akma ketang ustu?
    Inia e ta’ dapat ikamua o nanu
    Ing puna o pintas ding aliwang tau.

    Mikalu-kalu ta’ king keyang panyulung
    At e mipalkasan king metung at metung;
    Ban keta kambe ning pamiagum-agum,
    Sabing Kapampangan, akua nang lumabung,

    At masese ustu, malinang, magambul
    King danggut tang’ dila kaba’ ning panaun’;
    Kanita ta’ pamu lubus ‘pagmaragul,
    King itamu atin tang’ pamisanmetung!

    LEAVE A REPLY

    Please enter your comment!
    Please enter your name here